Facebook supera os 200 millóns de usuarios

A plataforma para redes sociais Facebook leva uns meses nun crecemento imparable, e mentres o pasado verán falábamos de que tiñan superado os 100 millóns de usuarios, nos últimos meses está a notarse aínda máis o seu pulo, cun forte crecemento en España e en moitos outros mercados que os levaron a chegar xa aos 200 millóns de usuarios segundo o propio fundador da compañía, Mark Zuckerberg, que ten claro que a localización da súa web foi chave neste éxito.
Para celebrar este novo momento histórico nace a iniciativa Facebook for Good, que servirá para compartir experiencias narradas polos propios usuarios deste servizo web que está a revolucionar o xeito de relacionarse a xente a través da Rede, e paralelamente pretenden achegar fondos a 16 organizacións sen ánimo de lucro (doando parte dos ingresos da tenda de agasallos de Facebook).