Microsoft presenta Visual Studio 2008 en español

A compañía de software do magnate Bill Gates, Microsoft, vén de presentar as versións en español de Visual Studio 2008 e de .NET Framework 3.5., dúas aplicacións que reforzan a estratexia da compañía de Software + Servizos, que naceu coa misión de facilitar diversas vías de acceso á innovación da multinacional, adaptándose ás necesidades particulares de cada usuario.
As devanditas ferramentas son unha evolución dos modelos tradicionais do software, na que se combinan as solucións fisicamente instaladas en ordenadores, servidores e outros dispositivos cos servizos a través de Internet. Segundo afirman os seus creadores, grazas a estes programas, os usuarios “poden chegar a entender a a tecnoloxía como algo vivo, integrado, persoalizado e sempre dispoñible en liña dende calquera lugar”.
O Visual Studio 2008 é un entorno unificado de desenvolvemento que lles permite ós profesionais do sector usar un modelo consistente de programación para crear aplicacións a través dun amplo espectro de plataformas, incluíndo a Web, Windows Vista, Microsoft Office System 2007, SQL Server 2008 e Windows Server 2008.
En resumo, e en palabras de Enrique Fernández-Laguilhoat, director de Plataforma e Desenvolvemento de Microsoft Ibérica, como principais áreas de mellora desta nova versión pódense salientar “a renovada experiencia de usuario, integración con servizos e tecnoloxías, e a evolución do traballo colaborativo dentro do ciclo de vida de deseño de software (ALM)”.
A versión en español de Visual Studio 2008 estará dispoñible no mercado a partires do vindeiro 1 de febreiro para os subscritores MSDN en España.