Lanzada unha aplicación galega para axudarnos a acadar un posto de traballo: Appladin
venres, 28 de novembro do 2014
Estes días soubemos da
posta en marcha dun novo servizo galego encamiñado a botarlles unha
man aos internautas que estean á procura dun posto de traballo.
Trátase da aplicación Appladin
e segundo nos conta Alberto Rodríguez, un dos seus responsábeis
directos, exemplifica á perfección un xeito de facer innovación
empresarial (cos conseguintes e lóxicos beneficios) ao tempo que se
fornece un recurso de claro interese social. En definitiva, estamos
ante unha ferramenta filla do seu tempo, do tempo da crise e dos
cinco millóns de cidadáns nas fileiras do paro, que quere responder
polo miúdo ao problema do desemprego. “O obxectivo é dobre”,
sinala Alberto, “e pasa por contribuír a que nos afagamos aos
novos xeitos de atopar traballo, xa que as formas mudaron claramente,
e tamén pasa por converter a tarefa de buscar un posto laboral en
algo que se poida facer en calquera intre e lugar”.
Ou sexa, que unha das
grandes vantaxes/particularidades de Applandin.net é que pon a
disposición dos internautas demandantes un servizo profesional
dispoñíbel ao momento, inmediato e básico. “Con esta
ferramenta”, aclaran os seus desenvolvedores, “adaptamos as novas
tecnoloxías ás necesidades actuais máis importantes dos cidadáns”.
Appladin, en palabras dos
seus creadores “a primeira aplicación de emprego do sector
servizos”, achégase con descarga e rexistro de balde. Unha das
súas principais características, a maiores do devandito, é a marxe
de manobra que pon a disposición do usuario. Así, con esta
aplicación é o propio demandante ou ofertante quen ten o control da
xestión do servizo ou os servizos. Ademais, pon en contacto
directamente a ofertante e demandante, “adaptando así ao mellor
profesional para cada servizo ou traballo”.
O seu funcionamento,
sinala Alberto, “é rápido e sinxelo”. Pódese descargar en
calquera teléfono móbil desde Apple
Store ou Google
Play. Dispón de valoración e opción denuncia para mellorar a
calidade do servizo así como para premiar aos máis salientábeis
profesionais de cada área. Desta maneira, un usuario poderá ter
referencias de calquera profesional antes de contratar o seu
servizo.
“Grazas a esta aplicación”, explican os creadores da
mesma, “quérese contribuír á inserción laboral de maneira
directa, sendo unha verdadeira lanzadeira de emprego para atoparmos
traballo amais dunha segunda fonte de ingresos”.
Arestora, Appladin xa foi
quen de xuntar a máis de 20.000 usuarios ofrecendo os seus servizos
en todo o territorio estatal. A ferramenta, que foi lanzada hai un
mes, ten ademais vocación de traspasar fronteiras. De feito, os seus
desenvolvedores informan que xa están a traballar “no seu
afianzamento a nivel internacional”.