Algúns editores de comics, revistas e libros de texto toman posicións fronte ao iPad

O anuncio do iPad de Apple veu acompañado pola aplicación iBooks que abría o trebello oficialmente aos libros electrónicos, á vez que The New York Times amosaba as posibilidades da adaptación da prensa ao novo produto estrela da compañía de Cupertino, de aí que non sorprende que os editores de comics xa estean a mirar se poderían comercializar os seus produtos para o novo dispositivo, o que parece bastante probable se temos en conta que xa na actualidade existen aplicacións para o iPhone coma ComiXology ou iVerse que permiten a lectura de banda deseñada, pese ás limitación de pantalla do móbil de Apple.
Que a pantalla do iPad sexa de 9,7 polgadas, cunha resolución de 1.024 x 768 píxeles, posibilita a lectura de moitos comics (non todos, pois dependería da densidade do seu texto), e así xa comenta que ComiXology está a adaptar a súa aplicación para iPhone ao novo tamaño, e incluso contan cun vídeo de proba de concepto do que será, demostrando que a nivel de aplicación non supón ningún reto, senón que serían os contidos comercializados para o iPad os que decidan se o trebello será un lector de comics ideal ou deixará esta prestación nun plano secundario.

Pixelmags facilita a adaptación de revistas ao iPhone

Polo momento, nin Marvel nin DC (as principais editoras de comics nos EE.UU.) anunciaron a súa postura fronte ao iPad, pero non sorprendería que lanzasen as súas propias aplicacións para o dispositivo de Apple, pois non esquezamos que a propia Marvel leva máis de 2 anos comercializando comics dixitais para o ordenador, e ten unha reducida parte do seu catálogo dispoñible a través de ComiXology.
Loxicamente, se o sector das viñetas mira ao iPad, os editores de revistas en papel tamén están moi atentos ao produto, e teñen certa confianza en que este tipo de dispositivos poidan manter a viabilidade dos seus negocios a medio/longo prazo, posto que permitiría a compra/subscrición de exemplares periódicos das súas publicacións, de aí que estean a xurdir distintas iniciativas para axudar á conversión de formatos aos novos soportes, coma PixelMags, que permite levar as revistas á pantalla do iPhone de xeito moi doado, agardando que en pouco tempo teñan lista a súa aplicación tamén para o iPad, o que agradecerán especialmente os pequenos editores, que non poden realizar grandes investimentos en novos ámbitos de negocio, de xeito que poden introducirse neste novo mercado cun risco practicamente nulo.

Inkling traballa na adaptación de libros de texto a novos soportes

Máis complicado o teñen os editores de libros de texto destinados á docencia, de aí que a compañía Inkling conseguise 1 millón de dólares en capital semente para emprender a súa actividade de converter os libros de texto estáticos que hai na actualidade nun formato enriquecido e innovador que poida cambiar o xeito de aprender e estudar no futuro, con ferramentas que faciliten a creación de elementos interactivos dos que poidan tirar proveito os editores. De todos os xeitos, dende Inkling non centran a súa actividade ao iPad ou ao iPhone, senón que oriéntanse a distintos soportes, buscando a máxima versatilidade, tendo incluso en conta a alta conectividade de futuros terminais que permitirían a interacción de alumnos e profesores dun xeito que actualmente entendemos coma de ficción científica.