A galega Edisa abre filial na República Dominicana

En tempos de crise, que se pode facer? A xuízo de empresas galegas como Edisa, está máis que nunca xustificado o de apostar forte e termar firme das rendas para coller máis impulso. Nesta liña é onde se insire a súa actual estratexia de crecemento, que vén dar novos froitos coa apertura da súa terceira oficina en Latinoamérica. Edisa, empresa con sedes en Vigo e Ourense especializada no desenvolvemento de solucións informáticas para a xestión empresarial (Libra é un bo exemplo disto) suma estas novas dependencias (abertas na República Dominicana) ás que xa mantiña en México e máis en Colombia. A maiores disto, a empresa galega porá en marcha, no seu centro de I+D de Ourense, a adaptación da plataforma Libra, acubillo de ferramentas para a xestión empresarial, ás necesidades específicas do mercado de Hispanoamérica.
Como lembraremos, Edisa, compañía galega fundada en 1983, centra unha boa parte dos seus esforzos na mellora e optimización, a través de diversas ferramentas, de tódolos proceso de negocio que se levan a cabo no seo dunha entidade. Arestora conta con máis de 500 clientes pertencentes a máis de 60 sectores de actividade, que na súa meirande parte son medianas e grandes empresas. Edisa dispón dun equipo humano de 200 profesionais. A súa facturación, no pasado exercicio, foi de 11 millóns de euros, dos que o 20% dedicáronse a actividades de Investigación e Desenvolvemento no seu seo, coordinadas, precisamente, dende o Centro de Innovación da Tecnópole ourensá. Alí desenvolven o seu traballo máis de 50 profesionais, desenvolvendo novas funcións para Libra ou ben adaptando a plataforma ás novas demandas dos mercados externos que, como o Latinoamericano, son agora un espazo de actividade corrente para Edisa.
A compañía galega comezou a súa busca de mercados internacionais no ano 2008, comezando a súa andaina en México para logo desembarcar en Colombia. Este proceso, sinalan os responsables da empresa galega, veu acompañado “dun importante esforzo en I+D co fin de adaptar a plataforma de xestión ás necesidades destes países e a súa contorna”.
Durante os últimos catro anos, engaden, leváronse a cabo un total de 10 proxectos nos sectores da alimentación, extrusión de aluminio e distribución farmacéutica e industrial, “todos eles en empresas de gran dimensión”. Para o seu afianzamento na República Dominicana, Edisa puxo en marcha o seu primeiro proxecto de integración de software nos Supermercados Bravo, cadea de establecementos que lidera o sector neste país. A xuízo de Carlos Suárez, director xerente de Edisa, “a estratexia de internacionalización de Edisa aposta polo desenvolvemento de sedes propias e, ao mesmo tempo, polo establecemento de alianzas con grandes partners locais, como Dynamic Consultants, unha empresa consultora especializada en estratexia e máis en implantación de sistemas con sede en Colombia, que opera en diferentes países de Latinoamérica; o noso obxectivo é ir da man dos mellores para asegurar que os nosos clientes de calquera lugar conten coa mellor solución posible para as súas necesidades”.