O Pont-Up Store quece motores cun avance centrado na dixitalización e o neuromarketing
luns, 19 de setembro do 2022
Este
martes 20 arranca o programa de actividades previas ao Encontro
de Emprendemento Pont-Up Store, que nesta novena edición vaise
centrar en mellorar a competitividade dos proxectos empresariais
nacidos na pandemia. Tres destas actividades están organizadas en
colaboración coas Cámaras de Comercio de Pontevedra, Vigo e
Vilagarcía de Arousa que permitirán seguimento en liña e que se
desenvolverán tamén de xeito presencial ata completar aforo no
salón de actos da sede da Cámara de Pontevedra.
A
primeira celebrarase este martes e trátase dunha formación centrada
na Viabilidade económica e o financiamento da
pequena empresa e que partirá da análise de balances como
ferramenta clave que vai permitir ás persoas emprendedoras tomar
decisións económicas e financeiras, a través da información
contábel, co fin de reducir a incerteza do medio ambiente
empresarial. A formación celebrarase entre as 10:30 e as 12:30 horas
e será impartida por Oscar Rey, membro do Consello Xeral de
Economistas e Asesores Laborais.
A
xornada do mércores centrarase en dar a coñecer as axudas e
subvencións para persoas autónomas e pemes galegas en ámbitos de
dixitalización, internacionalización, aforro e eficiencia
enerxética e enerxías renovábeis; comercio; emprendemento;
creación/contratación de emprego; igualdade, RSE e conciliación; e
I+D+i. A través da xornada preténdese dar a coñecer as axudas que
a modo de subvencións, préstamos, deducións e bonificacións...
reparten as distintas administracións públicas nestes ámbitos
tanto a nivel estatal, como autonómico, provincial ou municipal,
como impulso á actividade económica das persoas autónomas e as
empresas. A sesión A formación celebrarase entre as 10:30 e as
12:30 horas e estará guiada por Ana Vázquez, directora e fundadora
da empresa Prox e especialista na dirección e xestión de proxectos.
O
xoves será a quenda das ferramentas de comunicación a empresa.
Baixo o título A túa web non se vende soa: creatividade
e storytelling desenvolverase unha xornada
formativa entre as 10:30 e as 13:00 horas para dar a coñecer aos
participantes a Oficina AceleraPEME informar sobre as convocatorias e
recursos do programa Kit Dixital. O obxectivo é analizar os erros
comúns que levan aos clientes a malgastar o diñeiro das subvencións
ou do seu orzamento de mercadotecnia por contratar sen saber o que
queren, necesitan ou é adecuado para o seu negocio. A formación
virá da man de Pilar Iglesias, coordinadora da Oficina AceleraPEME
da Cámara de Comercio de Pontevedra e especialista en
desenvolvemento de programas de Innovación e dixitalización
empresarial; e Damián García, axente dixitalizador do programa Kit
dixital, e xerente da empresa Emotive Neuromarketing Technologies,
desde onde promove estratexias para conectar co público a través
das emocións e tamén dunha boa análise de datos.
Afondando
nos desafíos da comunicación online das empresas, o xoves
pola tarde, de 17:00 a 18:00 horas, aínda está previsto un
obradoiro telemático a través de Zoom organizado pola Deputación
de Pontevedra para Crear un plan de márketing dixital paso a
paso. A sesión insistirá na importancia de contar cunha
estratexia corporativa de mercadotecnia en liña como ferramenta
esencial para que unha empresa teña éxito na contorna dixital e
guiará ás persoas asistentes na creación do seu propio plan paso a
paso partindo dun nivel básico, polo que non será preciso ter
coñecementos previos. O obradoiro será impartido por Adrián
Fernández, licenciado en Comunicación Audiovisual pola Universidade
de Barcelona e cunha ampla experiencia e traxectoria profesional
asesorando empresas de diversos sectores no ámbito da comunicación
dixital e a mercadotecnia online.
E
por último, tamén se inclúe dentro deste bloque de actividades do
Espazo de Desenvolvemento de Competencias, un obradoiro organizado en
colaboración coa Comunidade WordPress Pontevedra, e enmarcada dentro
do WordCamp Galicia (23-25 de setembro), que baixo o título
WordPress en Acción: obradoiro de iniciación e Do-action,
desenvolverá unha sesión formativa teórico-práctica para
iniciarse no mundo do WordPress e descubrir o fácil e rápido que é
crear unha web con esta ferramenta. Será o venres de 9:30 a 18:30
horas na Facultade de Comunicación da Universidade de Vigo, no
Campus da Xunqueira.
Pont-Up Store
O
Pont-Up Store é unha iniciativa da UVigo e o Grupo G4 Plus, liderada
polo Campus CREA de Pontevedra, e conta co apoio da Concellaría de
Promoción Económica do Concello de Pontevedra como patrocinador
principal, e tamén co respaldo da Deputación de Pontevedra, Abanca,
Zona Franca e R, entre as máis de 50 entidades públicas e privadas
que durante estes anos foron sumándose ata conformar un ecosistema
de apoio ao emprendemento co obxectivo de converter a Pontevedra na
“capital galega das mellores iniciativas empresariais”. Nas
labores de organización e coordinación, o encontro conta tamén coa
participación da Asociación para o Emprendemento e Innovación
Pont-Up Store, que ten como obxectivo aproveitar a experiencia e os
valores promovidos polo encontro ao longo destas oito edicións,
garantir a continuidade da celebración anual do evento e apoiar
tanto aos novos emprendementos como a toda a comunidade de
participantes, que representa a preto de 300 iniciativas procedentes
de toda Galicia.