Código Cero - Diario Tecnolóxico de Galicia

O Goberno recúa nas súas pretensións de que os buscadores paguen ás compañías de telecomunicacións

Marcus Fernández — 2010-03-09T20:33:00Z

As polémicas declaracións de César Alierta, presidente de Telefónica, asegurando que os buscadores de Internet deberán pagar ás operadoras de telecomunicacións por usar as súas redes, parecen non estar a acadar os apoios que algúns agardaban, de xeito que a proposta anteriormente redactada polo Goberno español para solicitar a regulación comunitaria dos «intermediarios de Internet» (os buscadores) para forzalos a contribuír economicamente no sostemento das infraestruturas de rede vén de sufrir unha modificación que parece deixar de lado as anteriores ameazas á neutralidade da Rede.
O novo documento limítase a destacar que haberá que estudar as «posibles posicións de abuso» que poidan ter lugar por parte de axentes que non estean relacionados directamente coa infraestrutura de rede, ou sexa, que pásase dunha reclamación económica a unha mera precaución anti-monopolística. Deste xeito, as intencións dalgunhas operadoras de telecomunicacións vense frustradas ante a imposibilidade de actuar contra o regulamento vixente.
Nesta mesma liña, Rosa María García, vicepresidenta de Microsoft para Europa occidental, nunha intervención en Martins Esade, declarou estar en contra de que os provedores de servizos paguen por utilizar a infraestrutura de comunicacións e pediu a Telefónica «claridade» á hora de definir se son os provedores ou os consumidores de servizos os que deben pagar.

Especialistas galegos en TIC deseñan software específico para o sector das renovables

Fernando Sarasqueta — 2010-03-09T18:30:00Z


Beatriz Tejada, coordinadora técnica de Er-Innova

Toca falar das amplas e firmes conexións entre as novas tecnoloxías da información e os recursos para acadar meirande sostibilidade enerxética nas nosas empresas, dous eidos de actividade que se apoian mutuamente de maneira case obrigada. Por dicilo doutra maneira, será ben difícil atopar unha compañía do sector das renovables ou do aforro enerxético que non bote man de software para acadar mellores obxectivos, do mesmo xeito que unha empresa TIC tenderá sempre a escoller aquilo que lle permita máis percorrido coa menor cantidade de combustible. Disto, de establecer meirandes conexións entre unhas e outras, trata en parte o proxecto europeo Er-Innova, alianza empresarial presentada hoxe na Tecnópole e chamada a dar acubillo a preto de cen empresas galego-portuguesas do sector das renovables. Durante a presentación da iniciativa, entre outras achegas, presentáronse ferramentas dixitais para o día a día das firmas deste tecido produtivo en espallamento.
Asemade, no transcurso da sesión técnica celebrada na sede da Tecnópole (xefe de fila do proxecto), déronse a coñecer polo miúdo os obxectivos da iniciativa, posta en marcha en 2009: incrementar a competitividade das pemes do sector, as condicións de traballo, o seu posicionamento no mercado e máis a implantación no seu seo de ferramentas baseadas nas novas tecnoloxías e deseñadas para atender ás súas necesidades de maneira específica.
Durante a xuntanza tamén se fixo fincapé no papel que xoga a iniciativa como avaliadora das necesidades e das carencias das empresas integrantes deste tecido produtivo, traballo que xa deu os seus primeiros resultados. Por exemplo, o deseño de dous tipos de ferramentas TIC de código aberto, labor adxudicado mediante concurso a tres consultoras galegas. Segundo conta a Tecnópole, o eido de actuación destes recursos será, en primeiro lugar, o da xestión para a optimización dos procesos empresariais básicos, a través de aplicacións de escritorio tales como sistemas de planificación de recursos empresariais (ERP) e de administración da relación cos clientes (CRM).
En segundo lugar, estase a traballar en ferramentas en liña orientadas a fomentar o traballo colectivo en investigación e a venda por Internet. O resultado de todo isto, engade o complexo empresarial galego, será unha plataforma web para a construción de proxectos colaborativos nas áreas de I+D e innovación, e para impulsar (tamén) “as transaccións on-line entre os distintos axentes que operan no mercado das enerxías renovables, con especial incidencia na implantación da factura electrónica”.
O proxecto está cofinanciado polo Fondo Europeo de Desenvolvemento Rexional (FEDER) da Unión Europea ao abeiro do Programa Operativo de Cooperación Transfronteiriza España-Portugal 2007-2013. O seu marco temporal é bianual (2009-2010) e conta cun financiamento total de 931.693,68 €, dos que o 75% procede dos FEDER.
Os socios do proxecto son, ademais de Tecnópole, a Asociación de Empresas Galegas dedicadas a Internet e ás Novas Tecnoloxías (EGANET); a Fundación para o Fomento da Calidade Industrial e o Desenvolvemento Tecnolóxico de Galicia, a través da súa Oficina de Programas Internacionais de I+D+i (OPIDi); e NET Novas Empresas e Tecnologias, S.A.-Business and Innovation Centre do Porto (NET-BIC Porto).

Chega a Galica a campaña de fomento do uso do DNIe

Marcus Fernández — 2010-03-09T18:02:00Z

O Ministerio de Industria iniciou unha campaña informativa co obxectivo de que cidadáns e empresas coñezan máis de preto os usos e vantaxes do documento nacional de identidade electrónico (DNIe), que principalmente serve para facilitar a realización de trámites coas Administracións Públicas evitando desprazamentos, colas e limitacións de horario.
O plan de actuacións para o fomento do uso do DNIe iniciouse hoxe mesmo en A Coruña, nun acto no que Salvador Soriano, subdirector xeral de Servizos da Sociedade da Información; Antón Louro, delegado do Goberno en Galicia e Luis García Mañá, xefe superior da Policía de Galicia, informaron das actuacións previstas de aquí a xullo, entre has que hai unhas 520 sesións informativas, máis de 30.000 sesións de dinamización e demostración nas principais oficinas de expedición do DNI, xornadas técnicas, accións destinadas a superar os atrancos que atopa a xente con discapacidade e a distribución de balde de 800.000 lectores de DNI electrónico.

A derradeira fase do apagamento analóxico na nosa terra comeza este mércores

Fernando Sarasqueta — 2010-03-09T17:52:57Z

Para quen non o saiba, ben porque vive nunha zona de plena cobertura da TDT (e considera que o traballo xa está feito), ben porque lle segue dando uso ao analóxico dende unha zona aínda non apagada pensando que vai durar sempre (e o conto vai camiño de ir rematando), aínda queda por facer no despregamento da Televisión Dixital Terrestre na nosa terra. Segundo informa a Secretaría Xeral de Medios (ente responsable destes traballos a nivel galego), os traballos finais para o espallamento definitivo da TDT na nosa xeografía darán comezo esta mesma semana. Esta derradeira fase, a terceira, do apagado analóxico arrancará o mércores 10 de marzo para rematar o vindeiro 2 de abril, abranguendo a preto de 1.300.000 galegas e galegos. Co remate desta terceira etapa dos labores, a desenvolver nas áreas técnicas de Domaio (unha boa parte de Pontevedra e cinco concellos da Coruña) e Páramo (unha boa parte de Lugo), a poboación galega terá acceso exclusivo á televisión dixital, significando este feito o adeus definitivo ao sinal antigo que todos coñecemos: o analóxico.
Lembrar que as fases I e II do apagamento realizáronse en Galicia do 18 de xaneiro ao 1 de febreiro e afectaron a 1.550.000 galegos, o 56% dos cidadáns do país, pertencentes a 203 concellos. Os traballos a desenvolver ao longo desta semana virán acompañados das tarefas consultivas de costume por parte da Secretaría Xeral, que seguirá a manter as canles habilitadas as pasadas semanas para resolver as posibles dúbidas da cidadanía acerca da implantación da nova tecnoloxía. Así, ficará activo o teléfono de atención 012. Neste senso, e co fin de que o paso dunha plataforma a outra sexa o máis fluído e doado posible, a Xunta recoméndalles aos cidadáns implicados na última fase do despregue que non agarden até o último día para adaptar a súa televisión á tecnoloxía dixital. É dicir: recoméndalles que teñan feitas as adaptacións precisas na súa antena e que conten co decodificador que posibilita a recepción axeitada do sinal.
Para máis información sobre o traballo a desenvolver e as áreas que abrangue o mesmo, a Xunta habilitou un documento coa información pormenorizada sobre as etapas.

Galiciadixital fai a súa última parada nun centro de saúde ourensán

Raquel Noya — 2010-03-09T17:52:49Z

Galiciadixital, a exposición itinerante da Secretaría Xeral de Medios, que nos últimos meses está a deixarse ver nos centros hospitalarios e sanitarios de toda Galicia, facéndolle a estancia alí máis levadeira aos doentes e familiares que se achegan a visitalos, vén de facer a súa última parada no centro de saúde Valle Inclán de Ourense, onde estará ata o vindeiro luns, 15 de marzo.
A mostra, organizada pola devandita entidade pública en colaboración coa Consellería de Sanidade, poderá visitarse de balde en horario de 10:00 a 14:00 e de 16:00 a 20:00 horas, agás o sábado pola tarde e o domingo, que estará pechada.
Á inauguración, que tivo lugar hoxe ás 12:00 horas, asistiu o delegado territorial da Xunta de Galicia na provincia de Ourense, Rogelio Martínez, que convidou a todos os cidadáns a visitar a exposición, especialmente a aqueles que non coñeceran a mostra Galiciadixital permanente, ubicada no mosteiro de San Martiño Pinario, en Santiago.
Martínez, que incidiu na importancia de que esta exposición chegue a un centro sanitario, onde asegurou, “a pode visitar máis xente”, estivo acompañado da xefa territorial de Sanidade, María José Villar Suárez, o xerente de Atención Primaria de Ourense, Carlos Pereira, e o concelleiro Agustín Fernández Gallego en representación do Concello de Ourense, quen agradeceron a presenza dos asistentes ao evento e louvou a iniciativa de levar Galiciadixital aos centros de saúde.
Esta mostra itinerante é só unha parte da exposición Galiciadixital permanente, que ten a súa sede en Santiago desde hai unha década, tempo no que ten recibido máis de 600.000 visitas. A través dela, a Secretaría Xeral de Medios pretende amosar aos galegos e galegas de todas as idades o audiovisual e os contidos multimedia realizados por empresas e universidades galegas.
De novo, Galiciadixital ofrécelle aos visitantes unha experiencia interactiva distinta á dos museos convencionais, pensada para que non sexan simples espectadores, senón que participen en todo o seu percorrido, achegando así os avances en tecnoloxías multimedia e audiovisuais producidas en Galicia á cidadanía dende localidades preto da súa residencia.
Como nas anteriores ocasións, as persoas que se acheguen estes días ao centro de saúde ourensán, poderán disfrutar da experiencia que ofrece Cidades do Camiño, o canciño Axóuxere ou o Tiraboleiro Virtual, entre outros contidos.

A web Yporquenosolo convida á viaxe por conta propia

Fernando Sarasqueta — 2010-03-09T17:29:58Z

Hai iniciativas ás que lles senta Internet coma unha luva. Neste amplo feixe de propostas do máis variado que non poderían case nin existir sen o poder de convocatoria da Internet atópanse sen lugar a dúbidas os recursos en liña relacionados coas viaxes e co turismo, dous eidos de actividade que nin sequera se esgotan nas páxinas persoais ou corporativas onde participan parellas ou grupos, senón que tamén lle achegan potencial a quen concorre só. De internautas e viaxeiros a título individual é do que trata Yporquenosolo.com, páxina web sobre as amplas posibilidades de non agardar a que apareza un/unha acompañante para botarnos ao camiño (ofrece plans de viaxe para persoas que non se coñecen entre si) e que vén de facer reconto de éxitos sobre a actividade deste ano e o anterior. A páxina, face visible da axencia do mesmo nome, é visitada cada ano por máis de 300.000 persoas e conta con arredor de 45.000 internautas rexistrados recibindo cada pouco o seu boletín de noticias.
A proposta, informa o seu creador, Santiago Rey, baséase na súa propia experiencia persoal, que logo dunha ampla experiencia organizando itinerarios para diversos grupos foi quen de descubrir que os que “mellor funcionaban” eran os colectivos integrados por viaxeiros sen relación previa algunha. A cousa, informa, comezou promovendo excursións pola Serra de Madrid e arestora xa se aplica a filosofía do viaxeiro pola súa conta a todo tipo de desprazamentos internacionais. Segundo apunta Rey, o 60% das persoas que foron convocadas a través da web para participar nunha actividade desta índole repetiron experiencia. O único requirimento para formar parte dunha destas viaxes é acudir só/soa.

Vigo segue a pelexar por traer para aquí a Axencia Estatal de Radiocomunicacións

Raquel Noya — 2010-03-09T17:29:53Z

O reitor da Universidade de Vigo, Alberto Gago, que está a facer todo o posible para que a entidade que representa acade a Excelencia Internacional grazas ao proxecto do Campus do Mar, vén de reunirse recentemente co alcalde da cidade, Abel Caballero para solicitralle o seu apoio e conseguir gañarlle a tirapuxa ás outras máis de trinta entidades académicas que optan a esta calificación.
Na reunión mantida entre alcalde e reitor, ademais de falar do Campus do Mar, ambos os dous aproveitaron a ocasión para tratar outra cuestión de relevancia tanto para a cidade pontevedresa como para a súa Universidade, como é o feito de formar parte do consorcio para a constitución en Vigo do xestor técnico da rede mundial de satélites da Axencia Estatal Europea, algo que Caballero aceptou a petición de Gago.
Trátase, segundo afirmou o edil, “dun proxecto de grande envergadura que permitirá situar en Vigo o control, a capacidade e a elaboración de sistemas de satélites”, o que supón, segundo engadiu, “capacidade de I+D e a eventual capacidade de movilización económica que lle fai falla á cidade”.
Gago, pola súa banda, que salientou a relevancia deste proxecto “para converter a cidade de Vigo nun referente das telecomunicacións en Galicia e en España”, asegurou que se trata dun obxectivo “que xa tomou forma co proxecto Gradiant, ao que están vinculadas as principais empresas do sector en Galicia”.
Ao longo deste encontro, os dous persoeiros tamén tocaron o tema da Axencia Estatal de Radiocomunicacións (AER), do que tanto se vén falando nos últimos meses, e a este respecto, Caballero asegurou que “falar deste ámbito no eido das telecomunicacións é falar da cidade de Vigo”.
Malia que Cataluña e Andalucía constitúen as principais localizacións alternativas para a AER, Gago incidiu en que “hai condicions máis que suficientes en Galicia e en Vigo para imaxinar que esta axencia poida estar aquí”.
Na actualidade, segundo informan dende a entidade académica, “o Ministerio de Industria está a elaborar a folla de ruta da Axencia”, o organismo regulador a nivel nacional das telecomunicacións, incluida a designación de frecuencias, que podería vir para Galicia de cumplirse as pregarias do edil e o reitor.

O 92,4 por cento dos fogares galegos xa acceden con éxito á TDT

Raquel Noya — 2010-03-09T16:42:18Z

A Secretaría de Estado de Telecomunicacións e para a Sociedade da Información, dependente do Ministerio de Industria, achegou onte os datos máis recentes sobre o estado do proceso de transición á TDT en España, e a un día de que dea comezo a derradeira fase do peche analóxico, (que se iniciará mañá mércores día 10 de marzo), os datos publicados vense tamén moi alentadores para a nosa Comunidade.
“xa acceden ás canles da TDT, mentres que o 99,4 por cento coñecen este novo sistema audiovisual dixital”, ao que se adaptaron, segundo Ros, cunha “naturalidade e madurez significativa”
Asemade, cando falta menos dun mes para que conclúa o proceso de transición, previsto para o vindeiro 2 de abril, máis do 95 por cento da poboación galega xa adaptou as súas antenas para recibir a agardada TDT e non ser pillada polo toro do anuncio.
O Ministerio de Industria, que está a realizar un esforzo informativo coas persoas maiores ao tempo que desenvolve distintas accións específicas dirixidas a este colectivo en risco de exclusión, visitará un total de 1.586 localidades das 45 provincias españolas a través de autobuses itinerantes e puntos informativos móbiles de ámbito rural e urbán.
Por outra banda, e xa dende o comezo do proceso, a Secretaría de Estado de Telecomunicacións e para a Sociedade da Información celebra reunións cos alcaldes e representantes institucionais dos concellos nos que se producen os cesamentos, e atende as consultas realizadas por todalas persoas interesadas a través do teléfono de información habilitado pola entidade pública, o 901 2010 04 e a web Televisiondigital.es.
Esta web, na que se inclúe un recopilatorio de guías, manuais, directorios de teléfonos e webs de referencia con información sobre a TDT, vén de incorporar un novo apartado dedicado exclusivamente a proporcionar orientación práctica ao cidadán ante posibles problemas ou dúbidas que poidan xurdir ao tratar de ver a nova televisión.

Activistas en liña fanlle chegar ao Goberno a listaxe de 1.200 webs a prol das descargas

Fernando Sarasqueta — 2010-03-09T16:14:54Z


7 hacktivistas fixeron entrega da lista de Sinde

Se hai algo no mundo ao que costa variarlle os seus hábitos é sen dúbida o usuario da Rede, e todo iso malia a natureza espallable e cambiante do que ten entre mans (ou ben precisamente por ese motivo). Isto vén a conto porque dunha gran tentativa xeralizada de cambio de costumes é do que trata unha boa parte da política na Rede do Goberno de España, ao que lle preocupa (moito) o nivel de liberdade ao que se ten chegado no tema do ceibe intercambio de ficheiros. Dito doutro xeito: tal e como vimos constatando nos últimos tempos, é ben probable que a idade de ouro do eMule estea chegando á súa fin. Isto non significa que a comunidade internauta estea de acordo. Máis ben o contrario, se temos en conta iniciativas como a que se vén de levar a cabo: a entrega no Ministerio de Industria dunha listaxe de case 1.200 webs que promoven as descargas. Segundo conta Xornal, a idea dos responsables deste xesto é estragar as pretensións de pechar as webs que promovan ou anuncien os intercambios de filmes, cancións ou xogos.
A listaxe, que conta nas súas fileiras con pequenos buscadores de torrents (redes como portas abertas nos ordenadores polas que discorren os ficheiros), tivo o seu xermolo a finais de 2009, cando diferentes internautas a prol do libre fluxo cultural puxéronse de acordo na web Hacktivistas.net para botar a perder os obxectivos do Executivo central. Todo isto, por certo, fíxose baixo un nome común, A lista de Sinde, que falaba ben ás claras sobre a posición do grupo respecto do Goberno e do Ministerio de Cultura, coresponsable destes asuntos e dirixido por Ángeles González-Sinde.
O caso é que dende esta fronte colectiva animouse aos webmasters e blogueiros do Estado a incorporar xanelas nos seus espazos en liña para procurar arquivos de descarga na Rede. A medida, que vai en contra das bases do Anteproxecto de Lei de Economía Sostible (onde se inclúe esta arela de pechar páxinas web que dean azos ao intercambio libre) presentouse perante a Internet como un exemplo de desobediencia dixital contra o dito pre-regulamento.

LG quere competir co MacBook Air

Marcus Fernández — 2010-03-08T22:45:00Z

Os ordenadores portátiles MacBook Air crearon unha tendencia de deseño difícil para seguir para os competidores de Apple, coma demostrou o fracasado Dell Adamo (que vén de ser retirado do catálogo do seu fabricante tras medio ano á venda), pero dende LG non queren deixar pasar a oportunidade dun deseño elegante e rechamante e anuncian o lanzamento do LG X300, un portátil ultradelgado (con só 17,5 milímetros de grosor e 970 gramos de peso) que puido verse na pasada edición do CES de Las Vegas, e que finalmente chega ao mercado asiático este mesmo mes (para despois pasar a distribuírse polo resto do mundo).
O equipo goza dun formato moi transportable, pero non estamos ante un ordenador cativo, senón que conta cun procesador Intel Menlow a 2 GHz, con ata 2 Gb de memoria e 128 Gb de disco duro, que opera con Windows 7 Home Premium, carece de ventilador para un funcionamento silencioso e goza dunha autonomía de ata 7 horas.
A pantalla do LG X300 é de 11,6 polgadas, ten cámara web de 1,3 Mpíxeles, sistema de son SRS TruSurround HD e incluso integra un modem 3G para facilitar a súa conectividade sen fíos mediante banda larga móbil (polo que non sería de sorprender que puidera adquirirse de xeito subvencionado xunto cunha tarifa plana de datos).

Ubisoft prepara un novo xogo de fútbol para antes do verán

Marcus Fernández — 2010-03-08T22:14:00Z

Nun mercado dominado por dúas grandes franquías coma son Pro Evolution Soccer e FIFA, Ubisoft atrévese a entrar cun novo xogo para PC, Xbox 360 e PlayStation 3 chamado Pure Football, que estará centrado en partidos de 5 contra 5, con cámara sobre o ombro (somerxendo no xogo en vez de amosando unha perspectiva televisiva coma os seus principais competidores), personalización de personaxes e un modo multixogador local para 4 xogadores (soportando tamén un modo competitivo en liña de 1 contra 1).
Esta interesante aposta que posiblemente chegará a España baixo o título de Pure Fútbol ten programado o seu lanzamento mundial para o mes de maio.

Mio achega os seus navegadores GPS aos tablets

Marcus Fernández — 2010-03-08T21:27:00Z

Aínda que sen confirmarse a súa data de lanzamento nin prezo, está confirmado que imos ter en España o navegador GPS Mio Moov V780, que sorprende por querer fuxir de ser un dispositivo dun único propósito e presentar funcionalidades como a sintonización de TDT ou prestacións típicas duns dos tablets que comezan a chegar o mercado.
O Mio Moov V780 conta cun procesador a 600 MHz, 4 ou 8 Gb de memoria interna ampliable mediante tarxetas de memoria microSD de ata 32 Gb, pantalla de 7 polgadas cunha resolución de 800 x 480 píxeles e conectividade 3G (WiMAX noutros países). Sen dúbida, un dispositivo moi interesante que podería ser o futuro dos navegadores GPS, cada vez máis ameazados polos smartphones.

Scribblenauts terá secuela no outono

Marcus Fernández — 2010-03-08T21:02:00Z

A revista Nintendo Power confirmou que 5^th Cell xa está a traballar nunha secuela do revolucionario xogo Scribblenauts para Nintendo DS, que incluirá 120 novos niveis, un editor de niveis, un novo sistema de trucos, controis optimizados e máis de 10.000 palabras novas, con adxectivos xogando un papel importante nun título que consiste en invocar obxectos escribindo o seu nome para solucionar de xeito imaxinativo distintos retos.
A nova entrega de Scribblenauts estará dispoñible no vindeiro outono, e todo apunta a que desta volta aproveitará o potencial do seu sistema de xogo, corrixindo os problemas de manexabilidade cos que conta o título orixinal (que decepcionou a moitos xogadores, aínda que iso non impediu que conseguise un nivel de vendas notable).

Arquivan as actuacións contra outra páxina de ligazóns a redes P2P

Marcus Fernández — 2010-03-08T20:29:00Z

Continuando coa racha de sentenzas xudiciais contrarias ás entidades de xestión de dereitos de autor, o Xulgado de Instrución nº 1 de Madrid vén de arquivar as actuacións contra a páxina de ligazóns P2P Indicedonkey, ratificando que as ligazóns que publicaba na mesma non supoñen unha «comunicación pública» por non albergar os contidos denunciados, senón que simplemente sinalan onde están, coma xa aconteceu no caso da web de ligazóns Sharemula.
Indicedonkey foi unha das páxinas afectadas por unha operación policial de 2006 nas que bloqueáronse 17 páxinas de ligazóns a redes P2P das que xa arquivaron as denuncias contras os responsables dunha ducia delas, aínda que o seu percorrido xudicial continúa porque as decisións xudiciais foron recorridas.

Novo número da nosa edición impresa

Marcus Fernández — 2010-03-08T19:50:00Z

Como tódolos meses, chega outro número de Código Cero na súa edición impresa, que se pode achegar de balde nunha completa rede de puntos de distribución, podéndose descargar tamén en formato PDF.
Nesta nova entrega dedicámoslle unha especial atención ao Plan de Banda Larga 2010-2013, que achegará 232 millóns de euros para estreitar a fenda dixital e mellorar os servizos públicos de cara á cidadanía. Tamén facemos uso de códigos QR (ou BIDI) para achegar contidos en liña dende o teléfono móbil enriquecendo os contidos impresos.
Amais tratamos outros temas entre os que destacamos os seguintes:

Chegan dúas xuntanzas informáticas: Xuventude Galicia Net e Sobroso Party
Marcelino Fernández Mallo sácalle partido á Rede no seu blog
Rafael Valcarce, presidente do Clúster TIC de Galicia, fala dos seus obxectivos á fronte da alianza tecnolóxico-dixital
O Colexio de Arquitectos de Galicia propón impulsar as licenzas dixitais
Así-Red pon en marcha unha central de reservas turísticas libres de comisións
Ineo e Caixanova levan a Rede ao comercio
Investigadores novos galegos traballar para mellorar o Google Earth
Amosan en Barcelona o futuro dos móbiles
Entrevista a Santiago Cárdenas, director rexional de Tecnocom Galicia

Dúbidas sobre a calidade da pantalla do Nexus One

Marcus Fernández — 2010-03-08T18:34:00Z

A polémica está a preceder a chegada oficial do Nexus One á Europa continental, e non só está a dar que falar que varias cadeas de tendas coma The Phone House ou Media Markt estean a importar o terminal promovido por Google (pese a que carece de soporte por non comercializarse oficialmente en España), senón que agora o servizo técnico de HTC está a sementar dúbidas sobre a calidade da pantalla do terminal, xa que ante o envío dun Nexus One cunha pantalla avariada/rota que presentaba unha cor púrpura, deron a entender que o problema estaba provocado por sentar co móbil no peto duns pantalóns vaqueiros.
Agora seméntase a dúbida de se realmente a pantalla do terminal fabricado por HTC é moi fráxil, o que podería ser un grande problema, posto que a súa substitución é bastante cara (no caso en cuestión sae nunhas 180 libras esterlinas). Agardemos que todo quede nunha simple anécdota ao considerarse que os pantalóns vaqueiros son perigosos para as pantallas dos móbiles.

Ampla participación para a cata por videoconferencia da Feira do Viño de Chantada

Fernando Sarasqueta — 2010-03-08T17:26:29Z

Semella que en materia de innovación non hai nada imposible, mentres haxa alguén coa teimosía precisa mudar o que semellaba inmutable. En Galicia hai unha chea de cousas desta índole, ben enraizadas na nosa tradición e moi pouco suxeitas a cambios comunicativos. Unha delas é sen dúbida o viño e as celebracións que se fan arredor del: basicamente iguais, na súa esencia, ás que se levaban a cabo hai séculos. Porén, os responsables da Feira do Viño de Chantada e dos telecentros da dita vila lucense, Monforte, Oroso e Santiago veñen de darlle ao dito festexo un novo aire que ten moito de tecnolóxico ao mesmo tempo que de preservación da súa esencia. Trátase de levar a práctica da cata de viños, esencial dentro do programa da Feira, ao eido da videoconferencia.
Pois ben, segundo informa a Rede de Telecentros, xa están cubertas todas as prazas para participar dende as ditas localidades nesta proba de caldos colectiva e dixital, organizada (como dixemos) ao abeiro do programa da Feira. Con todo, os interesados en inscribirse nos puntos de acceso de Carballo, Catoira, Tui e O Barco aínda poden facelo dende o portal do Centro Multimedia de Galicia.
Poden facelo de dous xeitos: premendo na ligazón habilitada ou ben chamando ao Centro de Atención ao Usuario (CAU) do organismo, ao número de teléfono 902 922 270. Os asistentes a esta cita enolóxico-dixital, que se desenvolve das 20.00 ás 22.00 horas do día 11 de marzo dende o telecentro chantadino, terán ao seu alcance todo o material preciso para a cata, como os caldos, as cuspideiras, copas...
A enóloga Mar Vilanova, investigadora do Consello Superior de Investigacións Científicas (CSIC), será a encargada de abrir o acto e dar paso a unha cata guiada dos viños desa subzona, durante a cal todos os presentes en cada un dos telecentros poderán formular as súas dúbidas e experiencias, valéndose das vantaxes e posibilidades que lles ofrecen as novas tecnoloxías. Por certo que o límite de participantes para esta actividade é de 229 persoas.

A TDT chega xa en exclusivo a 15 millóns de españois

Fernando Sarasqueta — 2010-03-08T16:47:25Z

Se hai unha tecnoloxía das comunmente incluídas no paquete TIC da que se fale nos últimos tempos é sen dúbida a Televisión Dixital Terrestre. A cousa non é para menos: implicounos a todas e todos, quixerámolo ou non, a diferenza doutras canles TIC máis optativas ou ben (por caras ou escasas ou enleadas) máis inaccesibles. Segundo as diferentes administracións implicadas no proceso de adaptación dunha tecnoloxía (a analóxica: o sinal de TV de toda a vida) a outra (a dixital: a do decodificador e os cadradiños das deficiencias na recepción), os esforzos levados a cabo foron ben grandes e os froitos recollidos están á súa altura. O balance máis recente chéganos do Ministerio de Industria, máis polo miúdo da Secretaría de Estado de Telecomunicacións, que entre outras cousas vén de contabilizar máis de 15 millóns de cidadáns (case o 32% do total) de 3.900 concellos (case a metade do total) de todas as comunidades autónomas beneficiándose xa do cese de emisións en analóxico e da recepción en exclusiva da TDT.
O departamento do Goberno recordou durante a achega do seu informe que a derradeira fase dará comezo o vindeiro 10 de marzo para os proxectos que fican pendentes no peche da transición, indicando tamén que este troco dunha tecnoloxía por outra veuse desenvolvendo de xeito progresivo para darse por rematado no 3 de abril.
“O proceso de transición á TDT é un proxecto de gran complexidade técnica e cunha importante dimensión social”, engade o Goberno, “dado que a cobertura da televisión analóxica roldaba o 98,5% da poboación, e o 97,1% dos fogares españois recibe a televisión por ondas terrestres, fronte ao 41% da media europea”. Polo que respecta á cobertura da TDT, dise no balance, o sinal da TDT chega xa ao 98% da poboación, situándose o 90,5% dos fogares españois en disposición de ter acceso ás novas canles (o 7,5% restante da primeira taxa aínda non habilitou un decodificador ou levou a cabo as modificacións precisas na súa antena).
Asemade, sinálase, o 99% dos fogares do Estado asegura coñecer o novo sistema de emisión audiovisual. Polo que atinxe á cota de pantalla, a televisión dixital vai alén da analóxica en máis de 44 puntos. “En concreto”, puntualízase, “a cota de pantalla da TDT sitúase no 61,4% fronte ao 17,4% da televisión analóxica, correspondendo a porcentaxe restante á televisión por cable, satélite e ADSL”.

O portal de aprendizaxe chinés-galego, entre os máis valorados da Rede

Fernando Sarasqueta — 2010-03-08T16:47:21Z

Aprender chinés, por dicilo dalgunha maneira, debe ter o seu. De aí a pensar que o coñecemento mínimo desta lingua require recursos de xeito non hai máis que un paso. De pouco vale unha web expositiva ou un blog introdutorio sobre as vantaxes de saber o devandito idioma (moitas dende o punto de vista cultural e unha chea de las dende o económico e empresarial). Para a Consellería de Educación, o portal que impulsa a prol á aprendizaxe de chinés cumpre os requirimentos para ser eficaz e mesmo para ir alén diso. Para certificalo, o departamento da Xunta salienta o feito de que www.chinesecom.eu (así se fai chamar a páxina en cuestión) atopase acubillo entre os catro cursos en liña desta lingua máis valorados polo principal buscador da Rede a nivel internacional, sendo ademais “un dos máis visitados”.
Un dos puntos máis salientables da web, que contou coa participación da Dirección Xeral de Educación, reside en que se trata da primeira en achegar un curso de chinés-galego e en confirmarse como a única da súa natureza (cunha lingua minoritaria de por medio) no contorno europeo. Asemade, non se limita a fornecerlle á comunidade internauta unidades de aprendizaxe (un total de dez) senón tamén datos sobre a cultura do país asiático, favorecendo ao coñecemento do mesmo entre os nosos cidadáns e as nosas empresas, nos últimos tempos moi interesadas en colaborar con compañías chinesas na achega (por pór un exemplo) de alta tecnoloxía.
Chinesecom, informa a Xunta, desenvolveuse a través dun proxecto desenvolvido dentro do marco do programa Lifelong Learning, da Unión Europea, e nel participaron socios de seis países europeos, ademais dunha universidade de Pequín. “O éxito”, engade a Dirección Xeral, “débese en gran medida ao carácter innovador do mesmo, que incorpora abundantes recursos multimedia dunha gran calidade, e ao importante esforzo que vén realizando para a súa difusión internacional”.

Máis de 1.600 preinscritos no Xuventude Galicia Net

Redacción — 2010-03-08T12:32:49Z

O encontro informático Xuventude Galicia Net, seguindo coa tradición de pasadas edicións, este ano recibiu inscricións de xeito masivo, con máis de 1.600 mozos que cursaron a preinscrición correspondente nos últimos días, de xeito que xa teñen pendurado o cartel de prazas esgotadas, agardando que o evento que terá lugar entre os días 26 e 28 de marzo no Pazo de Congresos e Exposicións teñan un éxito de asistencia notable, consolidándose coma o maior evento deste tipo en Galicia.
Dende a Dirección Xeral de Xuventude e Voluntariado destacan que os interesados que quedasen fóra encontro pola limitación de prazas poderán asistir ao obradoiros que terán lugar de xeito paralelo á LAN party, polo que non quedarán totalmente apartados desta festa informática. Deste xeito, Xuventude Galicia Net transfórmase nun espazo para a aprendizaxe na que o público xeral pode achegarse ao deseño web, o software libre, as linguaxes de programación e outras materias de interese para os afeccionados á informática.
O encontro dividirase este ano en tres sectores cun único obxectivo: a aprendizaxe e o manexo das novas tecnoloxías.
O primeiro espazo, denomínase Intranet, que será o corazón da party. Para participar só é necesario levar o ordenador e alí poranse a disposición dos asistentes 40 quilómetros de cable e velocidade de conexión de 1 Gbps.
O segundo dos espazos, Extranet, supón outra forma de participar no evento. O acceso é de balde e aberto para todos os públicos. Esta zona situarase este ano no recinto exterior do Pazo de Congresos e Exposicións. Habilitarase unha carpa cuberta de 600 metros cadrados durante os tres días, onde terán lugar diversas actividades de ocio dirixidas a toda a familia.
Na terceira das zonas de Xuventude Galicia Net emprazaranse os obradoiros. O obxectivo de todas as actividades que se levarán a cabo neste espazo é afondar un pouco máis nas novas metodoloxías. Entre os talleres que se ofertarán destacan temáticas de fotografía, redes sociais, traballo e modelos de negocio en Internet ou traballo e modelos de negocio en Internet.

As empresas poderán actualizarse a Office 2010 a partires do 12 de maio

Marcus Fernández — 2010-03-08T11:38:00Z

Aínda que os usuarios de a pé teñamos que agardar a xuño para poder gozar do novo Microsoft Office 2010, a compañía de Redmond está a preparar un evento de presentación para o 12 de maio, de xeito que nesa data será cando as empresas que conten con licenzas por volume poderá facerse coa renovación deste paquete ofimático de Microsoft.
Amais, cómpre lembrar que os usuarios que adquiran a partires de agora o Office 2007 terán unha actualización de balde ao Office 2010, aínda que recoméndase verificar tal no momento da compra do software.