Non contentos coas preto de 300 tendas que teñen espalladas por 10 países de todo o mundo, os directivos da multinacional tecnolóxica Apple, para alegría de todos nos, veñen de anunciar que teñen intención de abrir en España as súas primeiras tendas propias, que está previsto que se instalen en Madrid e Barcelona, aínda que non é seguro ao cen por cen xa que a única pista que nos leva a estas cidades é que será nelas onde se fagan as entrevistas de traballo. E como todo negocio precisa de persoal que o atenda, a compañía colgou a pasada semana na súa web unha oferta de emprego para cubrir os distintos perfís profesionais que precisan as Apple Retail Store, é dicir, as populares tendas da compañía da mazá. Logo de varios meses (para algúns demasiados) de especulación e incerteza, a empresa de Steve Jobs vén de iniciar o proceso de selección de profesionais para cubrir os distintos postos que requiren as novas tendas no noso país, porén non se sabe con certeza a ubicación exacta das mesmas.

A Rede non sempre é unha Rede. Ás veces, cando se impón sobre calquera outra cousa o peso do estritamente dirixido á maioría, aparéceselle ás minorías coma o seu contrario: unha estrada sen acceso nin saída. Isto non é aplicable á web galega da que imos falar de contado, unha páxina posta en marcha polo grupo TADEGA e que se sitúa a medio camiño entre un conto virtual e un foro de experiencias arredor dese conto e da accesibilidade dixital mesma. Falamos da proposta Contos de Xandre, un sitio en liña que baixo o epígrafe Xandre, o elefante sen sombra diríxese a pór de manifesto entre a comunidade internauta a seguinte realidade: non todos os seus usuarios están na mesma disposición para facer uso igualitario dos seus servizos, propostas e equipamentos. Porén, e para que se entenda, os Contos de Xandre si que o está, de aí que todo o que aparece nela, o conto en si mesmo, sexa cen por cen adaptado e accesible para nenas e nenos con diversidade funcional. De feito, dispón de braille, lingua de sinais, pictogramas, audios, vídeos e outras canles e formatos.

Tras o anuncio do iPad, varios son os fabricantes que preparan accesorios para o mesmo, entre o que os primeiros serán sen dúbidas as fundas para protexelo, pero resulta curioso ver que dende LaCie, en vez de preparar unha liña de produtos específica para o novo trebello de Apple, simplemente decatáronse de que as súas dimensións coincidían bastante coas dos ultraportátiles de 10,2 polgadas, de xeito que advirten que as súas fundas LaCie Coat e LaCie ForMoa, con prezos de 17,90 e 23,90 euros respectivamente, serven perfectamente para acoller un iPad no seu interior, podendo optarse en ambos casos por un abano de cinco cores para elixir.