Vodafone e a Xunta entregan os galardóns de Connecting for Good, que terá continuidade
martes, 30 de maio do 2017
Este
30 de maio celebrouse na Cidade da Cultura a conclusión da primeira
convocatoria de Connecting for Good Galicia, a iniciativa de Vodafone, AMTEGA e Economía para impulsar e acelerar proxectos tecnolóxico-sociais con
vontade de mellorar a calidade de vida dunha manchea de colectivos.
Foi
unha xornada de traballo, de intercambio de experiencias e impresións
e, tamén, de galardóns (os Premios Connecting for Good Galicia).
A xornada, na que participaron arredor de cen persoas, contou coa
presenza de Mar Pereira, directora da AMTEGA (Axencia para a
Modernización Tecnolóxica de Galicia), quen abriu a entrega de
distincións salientando a excelencia dos seis proxectos
participantes (dos
que temos falado xa en Código Cero). Ademais, amosou o
agradecemento da Xunta a Vodafone “por apostar pola innovación
social e solidaria”. Na entrega de premios distinguíronse os
valores de Insulclock e máis de Robobo. Asemade, Vodafone avanzou
que Connecting for Good Galicia terá continuidade.
No
acto tamén participaron o director de Administracións Públicas de
Vodafone, Diego Torrico, e do director xeral da Fundación Vodafone
España, Santiago Moreno. Torrico salientou que a xuntanza deste 30
de maio foi o peche a “un proxecto ideal de colaboración
pública-privada”, en clara alusión ao acordo co Goberno galego (a
través de AMTEGA e o Pacto Dixital de Galicia) que propiciou a posta
en marcha de Connecting for Good Galicia. Torrico deulles os
parabéns a todos os participantes (Insulclock,
Robobo, MyKeeper,
Phottic, PsicoVR
e Xesmar) e mostrou a
satisfacción da compañía de telecomunicacións por ter participado
no dito programa, ao tempo que avanzou detalles da que será a
segunda edición do mesmo. Esta, por certo, xa
ten aberto (e até o 2 de xullo) o prazo para presentar
convocatorias, a través da web da Fundación Vodafone.
Amais
de Mar Pereira, o Goberno galego estivo tamén representado polo
conselleiro de Economía, Francisco Conde, que tivo palabras para
destacar a suma perfecta de dous ingredientes que amosaron os
devanditos seis proxectos: o ingrediente emprendedor máis o
ingrediente innovador. Tamén felicitou aos seus impulsores, gabando
a calidade das súas propostas e definíndoas como exemplos perfectos
de tecnoloxía ao servizo das persoas.
35.000
euros
Segundo
se fixo saber, os dous proxectos tecnolóxicos galardoados recibirán
unha contía de 35.000 euros: 25.000 euros para Robobo (a través de
GAIN) e 10.000 para Insulclock. A primeira das iniciativas foi
distinguida como Mellor Proxecto e a segunda co Premio Conectados
pola Accesibilidade. De Robobo salientouse o “seu carácter
innovador, o seu traballo en equipo, a súa aproximación ao mercado
e máis o aproveitamento do programa na súa execución e posta en
marcha”. De Insulclock tívose en conta a súa capacidade para
incorporar os principios de accesibilidade universal.
Máis
sobre Connecting for Good Galicia
Connecting
for Good Galicia é un programa impulsado por Vodafone e a Xunta de
Galicia, a través da Axencia para a Modernización Tecnolóxica
(AMTEGA) e a Consellería de Economía, Emprego e Industria, coa
colaboración da Fundación Vodafone España. O seu obxectivo é
“desenvolver iniciativas emprendedoras de innovación social
dixital en calquera dos ámbitos recollidos na Axenda Dixital de
Galicia 2020, valorando especialmente o enfoque inclusivo cara aos
colectivos de persoas con discapacidade e persoas maiores”.
Participantes
da primeira entrega
Como
dixemos, os seis proxectos participantes da primeira edición, foron
Insulclock, Robobo, KeeperTech, Phottic, PsicoVR e Xesmar. Todos eles
recibiron un diploma acreditativo e un patrocinio de 2.000 euros cada
un tras completar o programa de formación e asesoramento, ao que
AMTEGA contribuíu con 30.000 euros en cada convocatoria, e que se
impartiu no espazo Vodafone Connecting for Good, situado no Centro de
Emprendemento da Cidade da Cultura.
Segunda
Convocatoria
No
acto anunciouse a apertura da II Edición do Programa, ao que se
poden presentar candidaturas até o 2 xullo. Os seis proxectos
seleccionados poderán beneficiarse dun plan de formación de polo
menos seis meses, durante os cales impartiranse sesións sobre modelo
e plan de negocio e contarán con asesoría experta en temas de
comunicación, vendas, negocio, e accesibilidade para o
desenvolvemento dun plan personalizado para cada proxecto. Ademais,
disporán dun lugar de traballo no espazo Vodafone Connecting for
Good situado na Cidade da Cultura.
Cada
un dos proxectos seleccionados conta cun patrocinio de 2.000 euros,
outorgado por GAIN, e os seis proxectos poderán optar á concesión
dunha axuda extra de 25.000 euros da dita axencia e a un préstamo en
participación de até un máximo de 25.000 euros, a través de
XesGalicia. Ademais, Vodafone outorgará o Premio Conectados pola
Accesibilidade, cunha dotación de 10.000 euros ao proxecto que
mellor incorpore os principios de accesibilidade universal.