Un informe reflicte a reducida presenza da lingua galega nas redes sociais
venres, 9 de marzo do 2012
- Imaxe da inauguración dos Encontros
Hoxe remataron os XIV Encontros para a
Normalización Lingüística organizados polo Centro de Documentación
Sociolingüística do Consello da Cultura Galega, que nesta ocasión centráronse
na mocidade, o que levou que o evento centrase boa parte dos contidos no que o
lecer e as TIC poden supor para dar batalla polo galego. O encontro serviu así
para abordar temas como as redes sociais, os videoxogos e numerosas
experiencias como as que achegan proxectos dos que temos falado en numerosas
ocasións como Galegolab.
Destacou un adianto
que fixo o profesor da Universidade de Vigo Fernando Ramallo, dun informe que
analiza a presenza do galego nas redes sociais, e que publicarase en abril.
O estudo, encargado pola Secretaría Xeral de Política Lingüística, baséase en
1.295 enquisas a estudantes de bacharelato, ciclos formativos e universidade, e
quere servir como base para tomar decisións respecto á mocidade galega e as
TIC.
Entre a mostra do estudo temos só un 25% de galegofalantes e un 21% de
consultados que se desenvolven igualmente en español e en galego, polo que o
español tería un predominio claro e, de feito, só o 54% dos galegofalantes optan
por empregar só galego nunha plataforma como Tuenti, e só o 20% dos consultados
declaran usar o galego en xeral.
Ao expor estes datos Ramallo destacou que “a
rede e as novas tecnoloxías son tamén un medio poderosísimo para a expansión
das linguas dominantes, aínda que facilitan moito a visibilidade das
minoritarias. No caso das novas tecnoloxías falamos dunha cultura inherente da
mocidade” , matizando
que “as redes sociais poden entenderse
como unha finalidade ou como un medio para mellorar a presenza do galego”.
O profesor da Universidade de Vigo conclúe que “propostas como Latri.ca ou Cabozo son moi pouco coñecidas, mesmo entre
galegofalantes. Logo habería que incidir tamén nas interfaces das grandes redes
sociais, pero no que é o propio estímulo da lingua, penso que cómpre un labor
en termos máis xerais, fronte á acción específica nestas redes”.