Startup.gal presenta o primeiro mapa de novas empresas innovadoras da nosa terra

A asociación Startup.gal, comunidade aberta de emprendedoras e emprendedores galegas/os da innovación, presentou esta fin de semana un moi interesante recurso para coñecermos de primeira man os principais focos de emprendemento da nosa terra. Estamos a falar do que sería, nas súas palabras, o primeiro mapa de startups (novas firmas innovadoras) da nosa terra, cuxo obxectivo é mostrar en detalle a longa e dinámica listaxe galega de proxectos de mercado baseados no máis avanzado coñecemento e nas novas maneiras de traballar.
Startup.gal xorde ademais con varios extras que non se poden pasar por alto: a súa utilidade para comunicar a todos os axentes implicados e o seu obxectivo de converter Galicia “no mellor ecosistema posible para a creación de startups”.
Os criterios para escoller as empresas mostradas no mapa foron principalmente dous: que sexan empresas coa sede principal en Galicia e que sexan startups, é dicir que teñan un modelo de negocio “novidoso”, ou que “sexan firmas que usen tecnoloxías innovadoras para dar un servizo diferencial”.
Esta presentación só é un primeiro paso dunha iniciativa que se prevé longa no tempo, xa que a asociación anunciou a súa intención de “facer unha ferramenta viva, onde se vaian engadindo máis iniciativas e empresas segundo vaian aparecendo, e que tamén evolucione a propia presentación do mapa para mostrar máis información útil a potenciais clientes e investidores”. Amais, se ben os impulsores do mapa recoñecen que “nel non están todas as empresas que poden estar”, está previsto afondar ao máximo na fórmula da participación para, acadar, coa axuda de toda a comunidade de emprendedoras e emprendedores da nosa terra, achegar un recurso o máis completo posible (algo que se pode comezar a facer a través dun formulario específico habilitado).