Redeincuba recibe este mércores o seu pulo definitivo

O Edificio Emprendia da Universidade de Santiago acolle este mércores, a partir do mediodía, a posta en longo oficial dunha iniciativa dirixida a fomentar novas empresas de raíz innovadora e tecnolóxica e, a maiores, contribuír a que se fortalezan no mercado a través de todo tipo de canles de colaboración con outras empresas, entidades ou axentes de financiamento. Estamos a falar da Redeincuba, un acubillo de novas firmas que ten a súa sede no dito Edificio e que recibe mañá o seu pulo definitivo coa sinatura protocolaria de constitución, acto ao que asistirán os membros da xunta directiva e máis outras autoridades e persoeiros da vida académica e política.
Redincuba é unha iniciativa posta en marcha polas universidades galegas e outras entidades de impulso empresarial como Uninova, Tecnópole de Ourense, a Cidade Tecnolóxica de Vigo, a Fundación CEL de Lugo, o Consorcio da Zona Franca de Vigo ou o CEI-Nodus (Lugo). Máis polo miúdo, a Rede de Incubadoras de Empresas Innovadoras e Tecnolóxicas é unha entidade sen arela de lucro promovida por Uninova cuxo obxectivo principal é ser un instrumento de referencia en materia de creación de empresas, así como un elemento facilitador da cooperación entre axentes implicados na posta en marcha de novos negocios, e tamén, de transferencia tecnolóxica.