Os novos Moto G5 terán carcasa de aluminio

luns, 27 de febreiro do 2017 Marcus Fernández

Hai un par de semanas filtráronse as especificacións dos novos Moto G5 e Moto G5 Plus, confirmándose a veracidade de tal información ao chegar o Mobile World Congress, onde estes novos smartphones de gama media fixéronse oficiais, desvelando finalmente os seus prezos e confirmándose como uns produtos moi competitivos.
O Moto G5 é un smartphone con carcasa de aluminio (novidade na familia Moto G), procesador Qualcomm Snapdragon 430, 2/3 GB de RAM, 16 GB de almacenamento interno (ampliable mediante tarxetas microSD de até 128 GB), pantalla Full HD de 5 polgadas, cámara traseira de 13 Mpíxeles con apertura f/2.0, cámara frontal de 5 Mpíxeles con flash en pantalla, Bluetooth 4.2, Wi-Fi N, lector de pegadas dixitais e batería de 2.800 mAh que promete durar todo día. Probablemente convértase nun móbil moi recomendado polo seu prezo de 199 euros con 2 GB de RAM e 209 euros con 3 GB de RAM (prezos de saída no mes de marzo).
Pero o smartphone que sería realmente atractivo sería o Moto G5 Plus, non só porque a súa pantalla Full HD medre até as 5,2 polgadas e o seu procesador mude a un Qualcomm Snapdragon 625, senón porque a súa cámara traseira mellore considerablemente, contando agora cun sensor de 12 Mpíxeles, unha apertura f/1.7 e flash LED de dobre ton, sendo tamén capaz de gravar vídeo en 4K. Amais, a súa batería medra até os 3.000 mAh (que pode conseguir até 6 horas de autonomía con só 15 minutos de carga) e no modelo europeo contaremos con NFC (para facilitar os pagamentos co móbil). O seu prezo será de 229 euros con 2 GB de RAM e 32 GB de almacenamento interno, e de 279 euros con 3 GB de RAM e 32 GB de almacenamento.

O Moto G5 Plus ten unha cámara traseira con apertura f/1.7 e NFC, factores que marcan a diferenza fronte ao modelo básico

PUBLICIDADE