O XaTcobeo, aínda no espazo e logo de dez meses en órbita

O XaTcobeo, o satélite galego desenvolvido e lanzado ao espazo por investigadores dos campus de Ourense e Vigo, vén de pasar a liña dos dez meses en órbita. E, todo este tempo, operando sen pausa e achegando información malia ter pasado, todo hai que dicilo (e era de agardar, tendo en conta por onde se move), por condicións realmente complexas para calquera tipo de aparello tecnolóxico. O mérito é especialmente grande se temos en conta que a nosa terra estréase co XaTcobeo nun eido, o da enxeñaría espacial, no que non se tiña unha longa experiencia. Con todo, está fóra de toda dúbida que os deberes fixéronse ben, xa que o satélite galego e máis o que lanzou de xeito simultáneo a Universidade Tecnolóxica de Bucarest son os únicos representantes activos dos sete que se botaron ao espazo no mes de febreiro deste mesmo ano, no foguete da Axencia Espacial Europea (ESA).
Lembremos que o XaTcobeo xa superou previamente calquera expectativa xerada o pasado 10 de agosto, cando deixou atrás a liña das 180 xornadas en órbita, achegando comunicación continuada cos investigadores e os estudantes da estación de control de Vigo. E facilitando, deste xeito, tarefas como por exemplo verificar o bo funcionamento do despregue de paneis solares, levar a cabo os exames relativos á radiación solar e a capacidade do aparello para aturala ou avaliar a resistencia contra treboadas solares e altas temperaturas.
O XaTcobeo converteuse nunha realidade grazas á contribución da Universidade de Vigo, que, en colaboración co Instituto Nacional Técnica Aeroespacial (INTA), puido desenvolver un proxecto punteiro, coordinando a oito grupos de investigación, 30 doutores e 40 estudantes de postgrao.
O XaTcobeo, lembraremos, é un picosatélite que responde ao estándar de enxeñaría CubeSat, que permite a construción de satélites a baixo custe e en prazos breves, o que posibilita o acceso á tecnoloxía espacial para empresas e universidades. Alumnado, docentes e investigadores da Escola de Enxeñaría de Telecomunicación e da Escola de Enxeñaría Industrial do Campus de Vigo e da Escola Superior de Enxeñaría Informática do Campus de Ourense, foron os responsables do traballo de deseño, desenvolvemento, fabricación e integración, levado a cabo durante case catro anos.