O Sony Xperia 1 chega a España a semana que vén

xoves, 30 de maio do 2019 Marcus Fernández

Un dos smartphones que máis sorprendeu a moitos dos que pasaron polo MWC de Barcelona fora o Sony Xperia 1, por atreverse a adoptar un formato diferente ao habitual, xa que conta cunha pantalla OLED 21:9 CinemaWide 4K HDR de 6,5 polgadas, ou sexa, que ten unha pantalla ultrapanorámica, proporcións propia das pantallas de cine. A cámara tripla deste teléfono (con tres lonxitudes focais: 16, 26 e 52 milímetros) tamén presume de calidade profesional, de xeito que non teriamos un móbil apto para o consumo de contidos cinematográficos, senón tamén para a súa produción.
O Sony Xperia 1 permite gozar dunha grande procesión de cor co seu novo modo Creator con tecnoloxía de CineAlta, de xeito que permite dar vida ao contido tal e como se concibiu, e a nivel sonoro tamén é incorpora Dolby Atmos e soporta tamén estándares de son en alta resolución con ou sen fíos.
Aínda que en vertical a pantalla deste teléfono semella demasiado alta, entenden que pode verse como unha vantaxe ao poder gozar dunha rica multitarefa, partindo a pantalla en dous dun xeito doado, e podendo así realizar varias tarefas ao mesmo tempo (práctica tamén potenciada por fabricantes como Samsung).
Como vén a ser habitual nos móbiles de alta gama, o Xperia 1 é resistente á auga (IP65/68), ao po e aos impactos, e está equipado cun procesador Qualcomm Snapdragon 855, xunto con 6 GB de RAM, de xeito que ten garantido un grande desempeño con aplicacións esixentes e videoxogos.
O que por fin sabemos deste dispositivo é como vai chegar a España, xa que Amazon.es por fin o ten listado por 949 euros con 128 GB de almacenamento interno, e cunha data de saída fixada no 5 de xuño. Temos así que este produto que podería semellar interesante podería fracasar principalmente por ter un prezo claramente desproporcionado, así como cunha característica que podería chegar a ser problemática: a súa batería é de só 3.330 mAh (o que podería ser insuficiente para un smartphone tan potente de querer tirar proveito das súas capacidades).

O formato ultrapanorámico e a resolución 4K deste smartphone convérteno nun dispositivo moi atractivo para o consumo de cine

PUBLICIDADE