O MARCO de Vigo rastrexa durante tres fins de semana os vieiros presentes e futuros da arte dixital

O MARCO será o escenario, os vindeiros días, de tres fins de semana dixitais. De feito, o Museo de Arte Contemporáneo de Vigo vai ser (a partir de hoxe venres 7) un dos piares de ArtFutura, un programa de actividades artísticas que se celebra de xeito simultáneo en 20 cidades baixo un epígrafe que nos toca ben de preto e que alude a todas as cousas que aínda están por vir no terreo da creatividade e arte chantadas nas novas linguaxes: A promesa dixital. A edición deste ano avaliará o pasado, o presente e (sobre todo) o futuro da “euforia dixital” aplicada a todo tipo de formatos, expresións e expresividades. Haberá documentais, curtas e gravacións artísticas. Será ata o 23 de novembro, no salón de actos do MARCO.
En cuestión de documentais, estrearase en exclusiva unha obra titulada do mesmo xeito que o epígrafe das xornadas (A promesa dixital), coproducida por Bun Media, TVE e TV3, e centrada na evolución da cultura cibernética e dixital e o seu paralelismo co desenvolvemento de ArtFutura a través das súas 25 edicións (o documental rastrexa os cambios e as pegadas reais deixados neste tempo tralo paso da vaga tecnolóxica).
O programa 2014 tamén acubilla a sección exclusiva The Creators Project sobre artistas visionarios que empregan tecnoloxías para explorar os límites da creatividade, e os novos apartados Artworks (novos medios e o seu reflexo no formato vídeo) e Feeding the Web (sección adicada a mensaxes audiovisuais producidas directamente para a Rede, con obras de Steve Jobs, Alan Watts, Tiffany Shlain, Vicent Brady ou Brandon McCoy).
Haberá igualmente seccións específicas sobre a creatividade ligada a mundos e ambientes de animación por computadora en tres dimensións (3D ArtFutura Show), un apartado chamado Futura Graphics (que avalía o potencial de curtas, virais e videoclips no eido da animación dixital) e a retrospectiva 25 x 3D (visión sobre obras pouco coñecidas pero que marcan os fitos do devir da expresión en 3D). En total, informa o MARCO, “seis horas de proxeccións coas últimas achegas no eido da creatividade dixital”.