O CPETIG amplía os seus servizos grazas a un acordo coa Mutua dos Enxeñeiros

O Colexio Profesional de Enxeñaría Técnica en Informática de Galicia segue a facer esforzos para incrementar o número de servizos e vantaxes que pon a disposición dos seus membros, esforzos que na súa meirande parte van dirixidos a facilitar o seu traballo e, en última instancia, a protexer o libre desenvolvemento da dita profesión. Segundo informa o CPETIG, nesta liña insírese o acordo asinado coa Mutua dos Enxeñeiros, que en virtude deste achegamento pon a disposición das colexiadas e dos colexiados un bo número de entidades e servizos.
Entre estes servizos cóntanse os de Serpreco, corretaxe de seguros que favorecerá o asesoramento aos membros do CPETIG e ás súas empresas no eido da previsión social e dos seguros, persoais, profesionais ou patrimoniais, incluída a responsabilidade civil.
Ademais, procurarase en todo intre o aforro de recursos, “estudando de xeito individual as necesidades de cada caso, intermediando aquelas pólizas que lle sexan solicitadas”, informa o Colexio.
Amais do devandito, ponse a disposición das enxeñeiras e enxeñeiros o seguinte:
· MutuaValors. Servizos financeiros. A través de MutuaValors, ofrecerase asesoramento e intermediación, servizos de investimento financeiro, en calidade de axentes de axencia de valores.
· Mutravel. Axencia de viaxes. A través da entidade, a Mutua ofreceráselles os servizos propios dunha axencia de viaxes.
Todo isto, informa a maiores o CPETIG, supón na práctica a opción de contratar diversos produtos cotiáns (seguro do coche, fogar, saúde, viaxes, etc) en condicións vantaxosas.