O CPEIG distingue os esforzos a prol da inclusión tecnolóxica da asociación galega TADEGa

luns, 5 de maio do 2014 Fernando Sarasketa
JPEG - 145.1 KB
Juan José Fernández García, presidente de TADEGa

O Colexio Profesional de Enxeñaría en Informática de Galicia (CPEIG) fixo público o nome da entidade que vai recoñecer este ano a través do seu Premio e-Inclusión, un galardón que como o seu propio nome indica diríxese a distinguir os esforzos dos nosos profesionais para botar abaixo calquera atranco que se poida interpoñer entre o coñecemento e a cidadanía (atrancos que afectan hoxe en día a todo tipo de colectivos, por mor da súa formación, da súa idade, do seu xénero ou das súas características funcionais ou cognitivas). O premio en cuestión irá dar este ano a mans dunha das asociacións que máis ten loitado por tirar abaixo muros exclusivos na educación: TADEGa (Tecnoloxías de Atención á Diversidade na Educación Galega).
Segundo nos lembra o CPEIG, a asociación TADEGa, unha iniciativa galega sen arela de lucro, está composta sobre todo por profesionais da educación galega que se centran na atención á diversidade: diversidade funcional e cognitiva, terceira idade, multiculturalidade, o rural, altas capacidades, marxinalidade social, etc. Con este galardón, que se entregará oficialmente durante o desenvolvemento da sexa Noite da Enxeñaría en Informática de Galicia (o vindeiro 13 de xuño), a xunta de goberno do CPEIG quere salientar perante a sociedade galega e española o importante traballo realizado por TADEGa para “eliminar a fenda dixital e contribuír ao desenvolvemento das persoas con diversidade funcional”. Ao fío de explicar as motivación que levaron ao recoñecemento, o colexio engade que comparte coa asociación premiada o seu ideario, “no sentido de que considera a accesibilidade das TIC vital e base para que os sectores máis febles da sociedade poidan acceder a todos os contidos, servizos e oportunidades coma o resto da cidadanía”.
Asemade, o CPEIG valora que a asociación “promova a inserción e o aproveitamento das TIC no ensino galego e alí onde se prestan servizos de atención á diversidade, ademais da investigación, fomento e deseño das ferramentas e os métodos para obter o mellor proveito da tecnoloxía dixital e a súa inmersión nas aulas”.

JPEG - 101.8 KB
Imaxe dun obradoiro organizado por TADEGa hai un par de meses

Como lembraremos, TADEGa leva anos aplicando o seu compromiso socio-tecnolóxico-educativo en múltiples áreas e a través dunha manchea de actividades. Segundo nos contaban fontes da asociación en 2010, con motivo dunha mobilización de seu para acadarmos na nosa terra computadores accesíbeis para todos os nenos, a maior parte do que se desenvolve nos eidos de hardware, software e servizos en liña só ten en conta á maioría, deixando de lado a un amplo colectivo de persoas con diversidade funcional que teñen os mesmos dereitos fundamentais de acceso ao coñecemento cós demais. Para TADEGa, é unha realidade que as TIC (novas Tecnoloxías da Información e da Comunicación) veñen sendo unha nova ferramenta á vez que medios de comunicación múltiples e, no lugar de axudar á integración de todas e todos, aínda incrementan a segregación de quen non pode acceder a elas por causa dos “deficientes e discriminatorios deseños”. O obxectivo da asociación é duplo: por unha banda rachar esta fenda dixital e pola outra investigar, deseñar e propor as ferramentas, as maneiras e os métodos para obter o mellor proveito destas tecnoloxías dixitais nos eidos educativos. A entidade expón regularmente todos estes obxectivos polo miúdo, e tamén os froitos do seu traballo, nas diferentes convocatorias do Congreso TADEGa, a máis recente das cales celebrouse en novembro baixo o lema Inclusión e cultura dixital e ombro con ombro con Campus Culturae e a colaboración da USC.

PUBLICIDADE