O CITIC da Coruña acubilla 25 proxectos para a mellora dos nosos servizos de saúde

O Centro de Investigación TIC da Universidade da Coruña, CITIC, dá acubillo a importantes proxectos de desenvolvemento tecnolóxico en materia de saúde. Co fin de informar de todos eles, punto por punto, participa nas iniciativas InnovaSaude e H2050 que promove o SERGAS para facilitar a aplicación do noso amplo coñecemento TIC na mellora dos servizos sanitarios galegos (emerxencias, atención, monitorización, etc). Froito disto é o documento 25 maneiras de mellorar a nosa saúde mediante proxectos de I+D galegos (en pdf) que se están a impulsar dende o dito centro “con recursos y talento da nosa terra”. Entre estas 25 iniciativas inclúense, entre outras, un servizo para o xeoposicionamento en emerxencias (axeitado para casos de salvamento en exterior) e unha serie de ferramentas TIC para a monitorización detallada de persoas dependentes ou doentes nos seus respectivos fogares.
O obxectivo da participación do CITIC nas devanditas dúas liñas abertas polo SERGAS (que achegan un investimento de 90 millóns de euros) é favorecer que se cubran as necesidades actuais e futuras do sistema sanitario galego. As 25 iniciativas innovadoras insírense no seo dos subproxectos definidos polo Servizo Galego de Saúde e poden entenderse como “unha aplicación directa da I+D galega en materia TIC á sociedade da nosa terra”, sinalan fontes do CITIC.
Amais dos dous proxectos devanditos, na listaxe tamén se dá acubillo a un proxecto para a mellora da calidade de atención mediante o afianzamento das novas tecnoloxías nos domicilios, favorecendo unha redución das listaxes de espera (grazas ao traslado da persoa tratada do hospital á súa casa) e un tratamento moito máis agradable e cómodo para o paciente. Da mesma maneira, impúlsase un servizo para a xestión dos datos dos doentes (historias clínicas, patoloxías, herdanzas xenéticas), outro servizo para a prevención e tratamento das enfermidades (sistemas automáticos de detección de patoloxías que reducen o tempo de diagnóstico e tratamento), outro para a trazabilidade e localización de doentes e recursos hospitalarios, outro para a dinamización da vida saudable en persoas maiores (mediante o uso de dispositivos comúns como a TV e favorecendo a actividade física diaria, o mantemento ou a rehabilitación) e outro para favorecer a vixilancia activa en contornos hospitalarios dos servizos de urxencias.