Novidades dende Classora, o buscador intelixente galego

Classora, a base de coñecemento con raizame galega da que falamos con motivo dos seus primeiros pasos dados, xa comeza a coller corpo. Cómpre lembrar que se trata dunha das ferramentas tecnolóxicas máis ambiciosas que xurdiron o ano pasado da nosa terra e que, para facérmonos unha idea de en que consiste, estariamos a falar dun buscador que, a diferenza doutros recursos da mesma índole (mesmo Google), poría por fin un pouquiño de intelixencia real (non suxerida) na súa operatividade. Ou sexa, que sería quen de entender o significado de aquilo ao que dá acubillo. Segundo contan no blog propio os responsables do servizo, un dos seus grandes puntos a favor é o simple que resulta. Ou sexa, que está ao alcance de calquera, sempre e cando este usuario estea interesado en buscar unha información. Polo tanto, cóbrese ao 99,9% dos mortais.
“En primeiro lugar”, dise na bitácora, “en Classora pódense atopar rankings, clasificacións deportivas e listaxes de todo tipo; de feito, en canto a volume de datos, Classora é probablemente a meirande plataforma de rankings de Internet”.
O blog é pródigo en exemplos, e para facérmonos unha idea do que se achega nada mellor que botarlle un ollo á Clasificación da liga de fútbol de España (LFP), á listaxe de artistas que máis discos venderon ou á escolma das mellores actrices da historia do cinema. En caso de estarmos buscando un ranking en non dalo atopado, os responsables de Classora chaman á calma e a algo máis: á participación. De feito, ao igual que a Wikipedia e outros proxectos de Internet, Classora ábrese á comunidade de internautas para coller corpo, mellorar, completarse e desenvolverse. “En Classora podes participar engadindo novos contidos”, comenta dende a bitácora o equipo que dirixe Iván Gómez, fundador do proxecto.
Amais do devandito e desta vontade de abrirse, en Classora podemos ver moito máis que rankings e listaxes diversas: podemos ver unidades de coñecemento. A xuízo dos responsables do buscador, este “ofrécenos unha visión innovadora ao cen por cen da información que temos ao noso arredor”. Por exemplo, aínda que sabemos moito dun país como España ou dunha empresa como Apple, comentan, Classora pode cruzalos con tódolos rankings nos que figuran, o que permite obter unha radiografía instantánea dos elementos, unha pantalla con datos inéditos e interesantes para quen estea a procurar información. Isto lévanos ao comezo deste texto, cando falamos da súa vertente lóxica: o buscador está dotado de certa capacidade para interpretar os datos e responder a algunhas preguntas, indo alén de Google (que só devolve ligazóns a outras páxinas) e devolvendo coñecemento concreto. O proxecto, que aínda está en desenvolvemento (polo de agora hai que empregar unha linguaxe propia), ten malia todo isto os alicerces asentados. “Seguimos a traballar na iniciativa”, comentan, “e agardamos que cada vez os resultados sexan mellores”.