Nova plataforma de teleformación do Concello de Santiago de Compostela

O concelleiro de Promoción Económica, Emprego, Comercio e Turismo de Santiago de Compostela, Xosé Manuel Iglesias, presentou a Plataforma de formación máiscompostela, á que se accederá dende a páxina web da Concellaría e que ten coma obxectivo dar resposta ás demandas formativas do mercado laboral e do tecido produtivo compostelán, a través dunha ferramenta de formación de balde á que o alumando pode acceder as 24 horas do día.
A Plataforma de formación permite desenvolver a acción formativa dende calquera lugar: a propia casa, durante unha viaxe, etc. Esta dispoñibilidade de horarios axuda a facilitar a conciliación da vida familiar e laboral. Outras características que presenta son a súa gratuidade e a súa multidisciplinaridade.
Pode acceder a esta plataforma o equipo de xestión, o profesorado e o alumado dos cursos que, a partir de agora, organice a Concellaría de Promoción Económica a través do sistema de teleformación.
As primeiras accións formativas que se impartirán son os 13 cursos de teleformación do Plan de formación e mellora de competitividade para os sectores industrial, da construción, e do comercio e a hostalería (Plan de Formación 2009): Xestión Laboral, Xestión Contable, Xestión Tributaria, Liderado e xestión de equipos, Habilidades directivas, Calidade, Organizacion e comunicación na empresa, Axudas Públicas, Presentacións eficaces, Márketing e PEME, Atención á clientela, E-marketing e Loxística integral. Contan cun total de 200 prazas xa cubertas, para as que se presentaron 637 solicitudes e está previsto que comecen a impartirse dun xeito progresivo, a partires do 29 de xullo, coincidindo co comezo do curso de Xestión Contable.
No deseño do plan formativo Promoción Económica ten en conta os resultados da Enquisa de necesidades formativas.