Movistar estrea en España o móbil Huawei IVY

mércores, 26 de maio do 2010 Marcus Fernández

Os móbiles con Android están a chegar con forza ao mercado, e as distintas operadoras están a buscar terminais económicos para introducir no seu catálogo de xeito que Android non sexa sinónimo de móbiles de alta gama, e chegue a un maior público, sendo claro exemplo disco do Huawei IVY que comeza a vender Movistar en España, saíndo de balde no caso de contratarse unha tarifa plana de datos, ou por 100 euros en caso contrario, de xeito que é unha opción moi interesante para quen queira introducirse nas posibilidades do sistema operativo móbil promovido por Google.
O Huawei IVY ten unha pantalla táctil resistiva de 2,8 polgadas, cámara de 3,2 Mpíxeles con enfoque automático e flash LED, Wi-Fi, GPS, Bluetooth, USB, toma para auriculares estándar, e lector de tarxetas microSD (inclúe unha de 2 Gb). Mide 106 x 57 x 14 milímetros, pesa 105 gramos e estará dispoñible en branco ou en negro.
Este novo móbil vén co sistema operativo Android 2.1, aínda que en breve podería actualizarse a Android 2.2.
O terminal pode conseguirse a atractivos prezos a través do plan de puntos de Movistar, mentres que os usuarios que veñan doutras compañías poderán facerse con el de balde.

JPEG - 53.8 KB
Movistar achega o Huawei IVY a prezos moi atractivos

PUBLICIDADE