Máis de 9.000 persoas ateigaron os galpóns-cinema de Cans
luns, 23 de maio do 2011
- Unha das salas de proxección de Cans/ Imaxe de Rafa Costas
Máis de 9.000
visitantes e unha manchea de internautas de todo o espazo dixital seguindo de
preto o que deu de si a oitava edición do Festival de Cans, no Porriño. Nin
sequera a praia puído co pulo que segue a manter o certame galego, malia a
baixada dos apoios orzamentarios e o desenvolvemento paralelo dun festival de
semellante nome, ao outro lado dos Pirineos, con máis estrelas pero con moito
menos humor e sinxeleza. Segundo nos conta a organización, que ofreceu unha
completa cobertura do festival na súa web e en redes sociais como Flickr ou Facebook,
a resposta do público foi altamente satisfactoria cara ás novidades
introducidas este ano: o aumento no aforo das salas e a inclusión o programa de
máis estreas e máis coloquios entre profesionais do audiovisual e asistentes.
Sen dúbida, ao éxito
desta oitava edición tamén contribuíu a calidade da música programada, da man
de Siniestro Total, Gran Wyoming y Los Insolventes e Os Trebóns. A Asociación
Cultural Arela, responsable do certame, quixo destacar tamén o salientábel
afianzamento dos espazos de programación paralela ás curtas a concurso,
circunstancia que fixo preciso o desenvolvemento de sesións duplas e triplas
das propostas do Jalpón Friki e da Sala Multiusos, “converténdose o Jaliñeiro Unplugged xa nun dos sinais de identidade do
Festival”.
Entre as
actividades concretas que máis interese espertaron atópanse sen dúbida os
encontros dos directores, que contaron co apoio decidido do público, segundo
informa a organización, tal e como se puído ver coa ateigada cita de Fernando
León, na Leira de Alicia, cos seus seareiros.
Xa nun eido máis
puramente creativo e experimental, dicir que o festival consolidou a súa
colaboración coa Facultade de Ciencias Sociais e da Comunicación de Pontevedra,
sobre todo coa iniciativa Can Campus,
que lle permitiu a un grupo de alumnos e alumnas de Comunicación Audiovisual levar
a cabo traballo a “lume real e
conectounos coas correntes estéticas e industriais do sector audiovisual grazas
á titoría dos realizadores Juan Lesta e Belén Montero”. A iniciativa, na
que colaboraron máis de cincuenta persoas (entre estudantes, veciños e os músicos
do grupo Sinestesia), terá continuidade no futuro. A xuízo da asociación Arela,
constatouse que é “unha boa maneira de
promover grupos de música novos e amosar que Cans pode funcionar como o mellor
plató de gravación ao aire libre coa participación dos veciños e veciñas”.
Palmarés
· Premio de Honra
Pedigree´11, dotado coa estatuíña Can de Pedra: María Pujalte.
· Premio do
xurado á mellor curtametraxe de ficción, dotado co Can de Pedra e 1.500 euros: Estereoscopía,
dirixida e producida por Xacio Baño.
· Premio do
público á mellor curtametraxe de ficción, dotado con 1.000 € e Can de Pedra: De
que se ríen las hienas, dirixida por Javier Veiga e producida por Xosé Zapata,
IB Cinema.
· Premio do
xurado dos veciños de Cans á mellor curtametraxe de ficción, dotado co Can de
Pedra: El Grifo, de Denis Rovira Van Boekholt e producido por Continental
Producciones.
· Premio do
público á mellor curtametraxe de animación, dotado con 1.000 € e Can de Pedra: Vicenta,
dirixida por Sam e producida por Ignacio Benedeti Cinema.
· Premio do
xurado á mellor curtametraxe de animación, dotado co Can de Pedra e 1.500
euros: Birdboy, dirixida por Pedro Rivero e Alberto Vázquez e producida por
Abrakam Estudio, Postoma Studio, Cinemar Films e Uniko.
· Premio do
xurado á mellor interpretación masculina, dotado co Can de Pedra e 200 euros:
ex aequo a Celso Bugallo, por El Grifo, e Vicente de Souza por Estereoscopía.
· Premio do
xurado á mellor interpretatición feminina, dotado co Can de Pedra e 200 euros:
Toni Acosta, por De que se ríen las hienas.
· Premio do
xurado ao mellor guión, dotado co Can de Pedra e 200 euros: Javier Veiga, por De
que ser ríen las hienas.
· Premio do
xurado ao mellor videoclip, dotado co Can de Pedra e 300 euros: “Dos semanas”,
de Misterioso Viaje a Holanda, realizado por Juan Pablo Etcheberry
· Premio do
público ao mellor videoclip, dotado co Can de Pedra e 300 euros: “La marcha de
las hormigas” de El Cubo, realizado por Andrés Montenegro e Belén Mendaña.