Kodak declárase en suspensión de pagos para afianzarse no eido dixital

Kodak, compañía histórica do eido da fotografía e a imaxe, leva anos loitando por adaptarse aos novos tempos, definitivamente máis dixitais que analóxicos, ficando relegada esta segunda tecnoloxía, a analóxica, a seareiros teimudos e a saudosos de vellos métodos de creatividade. Pois ben, semella que a loita finalmente non valeu de moito, posto que o xigante da fotografía vén de declararse en suspensión de pagos. O motivo: reestruturar a súa actividade.
A compañía estadounidense, fundada en 1888 e propietaria de máis de mil patentes, busca mellorar e reordenar a súa posición de liquidez, tanto no seu país de orixe como no reto do mundo. Con isto, sinala, rendibilizaranse os seus dereitos de propiedade intelectual non estratéxicos e poderá concentrarse nas liñas de negocio que arestora lle poden de meirande potencialidade, máis polo miúdo as ligadas ao dixital. Isto, con todo, non é novo. Ao longo dos últimos anos, a compañía foi obxecto dunha serie de transformacións cara aos novos formatos e acubillos fotográficos, cousa que xa representaba o 75% da súa facturación.