Guifi.net leva Internet a prezos moi económicos ás aldeas do Courel
venres, 15 de xuño do 2012
Dende SOS
Courel informan esta semana dunha innovadora iniciativa aplicada
no seo mesmo da dita comarca luguesa (unha das máis esquecidas da
nosa terra en materia de servizos que faciliten o acceso á Sociedade
da Información), para favorecer o acceso e uso cotián das redes. A
iniciativa en cuestión, cualificada de “milagre”
dende o dito blog, vén da man da comunidade Guifi.net
e, como o seu nome indica (a través dunha simplificación moi
axeitada, do termo Wi-Fi), trátase de apostar pola tecnoloxía sen
fíos para facer o máis doado (e barato) posíbel o afianzamento das
redes no Courel, concretamente nas aldeas de Teixeira (Courel) e Praducelo (Louzara,
Samos).
Esta iniciativa foi posta hai case un ano e
achega prezos difíciles de crer a estas alturas, e con tódolos
servizos básicos disparando o seu custe: 40 euros ao ano por cada
veciña/veciño. A medida vén da man da Asociación
Valongo de Luzara, que, segundo indica o propio colectivo, non
está a atopar moito apoio entre os concellos e institucións da
contorna, “malia todas as vantaxes que
pon en xogo”. Onde si que se recibiu
a iniciativa cos brazos abertos foi nas ditas aldeas de Teixeira e
Praducelo: en Teixeira a Asociación Buraca das Grellas, solicitou a
colaboración da xente de Valongo e acadou unha pequena axuda da
Deputación para os materiais de transporte da sinal. A continuación
foi a quenda de Praducelo, que se uniu ao proxecto de Teixeira.
Con todo, hai máis núcleos galegos de
poboación da contorna que se adheriron ao proxecto, como por exemplo
Loseiro (Sarria), da man da Asociación Cultural Os Gorriós, onde
os veciños teñen
acceso de alta velocidade por cinco euros ao mes.