Continúan adiante as actividades da Semana da Ciencia 2006

Segue adiante a Semana da Ciencia 2006, que coordina en Galiza a Consellería de Innovación a través da Dirección Xeral de I+D e que este ano xira en parte arredor dos achados relacionados co cerebro. Nesta celebración –que se organiza a nivel europeo– están a participar ata 19 entidades galegas, entre museos, universidades, centros de investigación e tecnolóxicos, asociacións e fundacións.
Ademais, estanse a desenvolver 101 actividades de índole moi variada, e que van das exposicións ás visitas guiadas, sen deixar de lado actividades lúdico-formativas como ciclos de cine, teatro ou cafés científicos, tratando os organizadores en todo momento de quitarlle ferro á investigación científica e amosando a súa importancia para o benestar da sociedade.
Gran parte das actividades están deseñadas para captar un público novo, xa que deles e das súas vocacións depende –a fin de contas– o futuro da ciencia en Galiza e mesmo o desenvolvemento desta. Cómpre sinalar que a Dirección Xeral de I+D contará co apoio da Fundación Española e a Tecnoloxía (FECYT) do Ministerio de Educación e Ciencia. Podemos seguir de preto o programa de actividades na web expresamente deseñada para dar conta delas (http://www.semanadaciencia.org/) ou ben en www.diverciencia.org.