Continúa a saudade televisiva grazas a Youtube (desta vez recuperan ós clásicos das series de animación)

Que foi exactamente do Capitán Planeta? Por que hai tanta xente en Galiza que se lembra del? Na web de Prez Who? non é que nos dean a resposta a estas preguntas mais si que nos permiten refresca-la memoria nos seus feitos e fazañas, así como facelo tamén nunha ben extensa listaxe de personaxes de animación cos que medraron unha boa parte das/os internautas galegas/os.
Descubrímolo vía Pixel e Dixel e é unha desas boas obras de investigación, documentación e divulgación audiovisual que permite o Youtube.com e tamén (aínda que menos polo de agora) Google Video.
A listaxe de cartoons é ben longa: Beavis and Butthead, Peter Pan, X-Men, o dito Capitán Planeta, Batman, Casper, Clone Wars (Star Wars), Betty Boo, Conde Duckula, Futurama ou A Liga da Xustiza. Os arquivos son capítulos completos e están en inglés. Por certo que en Pixel e Dixel debeulles entrar a saudade televisiva, porque hai ben pouco recomendaban a visita á web de Stylus Magazine onde se recompilan os 50 mellores vídeo clips da historia, entre os que figura Michael Jackson con chapeu e pes en escaiola en repetidas ocasións, naqueles tempos en que lle saían imitadores frikis ata nas mellores familias.