BIC Galicia presenta a semana vindeira a súa rede de apoio ás emprendedoras TIC do noso país

BIC Galicia e Ineo van presentar a vindeira semana unha iniciativa concreta para apoiar ás mulleres emprendedoras do noso tecido tecnolóxico dixital: a Rede de Mentoras, un instrumento impulsado polas entidades devanditas dentro da Rede Mentoring de BIC Galicia co fin de promover a creación de empresas do devandito sectores con mulleres á súa fronte. A iniciativa estará conformada por mulleres profesionais deste eido produtivo, que prestarán a súa experiencia e asesoramento de calidade a mulleres que estean a dar os seus pasos no mundo empresarial e que, segundo apunta BIC Galicia, “necesiten dese pulo e dunha pequena guía estratéxica que lles permita poñer en marcha a súa idea”.
A rede será presentada pola directora xeral de BIC Galicia, Maite Cancelo, no marco do encontro convocado polas dúas entidades para reivindicar, fomentar e promover o papel da muller no ámbito galego TIC.
A xuntanza, programada en colaboración con APD, desenvolverase o mércores 14 co seguinte epígrafe: Emprender e dirixir en feminino. A muller emprendedora e directiva no escenario 2.0. O miolo do evento será unha longa e completa serie de exposicións e casos prácticos, persoais, de propostas femininas de éxito e de métodos para traballar a prol dun panorama máis igualitario. As participantes no evento, expertas na cuestión da actividade empresarial TIC, tamén achegarán recursos e consellos para conseguirmos a conciliación da vida laboral e familiar dende o liderado empresarial.
O foro desenvolverase no salón de grados da Escola de Enxeñaría de Telecomunicación da Universidade de Vigo, a partir das 9.30 horas da mañá. A asistencia será de balde, previa inscrición vía telefónica ou e-mail. O foro dará comezo coa intervención de Susana López Abella, secretaria xeral de Igualdade, e Jorge Cebreiros, presidente de Ineo.
Ao longo do evento participarán Edita de Lorenzo, directora da Escola de Enxeñaría de Telecomunicación, Patricia Araque, presidenta e cofundadora de Elas 2.0, Pilar García-Ceballos Zúñiga, directora xeral de INSA, Lourdes Guerra (Ayco Internet), Lourdes Sánchez (Ultreia Comunicacións), Luz Castro (Imaxin Software), Lucía Gregorio (directora xeral de Ineo), Maite Cancelo (directora xeral de BIC Galicia).