As universidades galegas súmanse ao programa de BlackBerry de formación de desenvolvedores de aplicacións

As tres universidades galegas xa forman parte do Blackberry Academic Program (BAP), unha iniciativa internacional para fornecer chan firme aos estudantes que queiran acadar un meirande coñecemento sobre programación e deseño duns recursos arestora en clara proxección: as aplicacións móbiles para a plataforma BlackBerry 10. O programa, que segundo informa a Universidade de Santiago xunta a máis de 1.340 institucións de 118 países, permite ás universidades integrantes (e aos seus estudantes e investigadores) acceder a todo tipo de materiais de balde, útiles para o desenvolvemento de aplicacións, ademais de posibilitar a participación nunha chea de actividades vencelladas ás novas tecnoloxías. A USC estréase neste programa de accións, sen ir máis lonxe, cunha xornada de traballo gratuíta sobre desenvolvemento de aplicacións móbiles con BlackBerry 10, este martes 30 de abril na ETSE.
Amais das universidades galegas, no devandito programa hai xa inseridas outras sete institucións educativas superiores estatais. Cómpre lembrar que o BlackBerryAcademic Program traballa con institucións académicas de todo o mundo para axudar aos estudantes na súa formación específica de programación e, tamén, para axudar á propia plataforma Blackberry a redeseñarse e renovarse cada pouco. Amais das galegas, as universidades que se unen ao BlackBerry Academic Program son a Politécnica de Madrid, a Autónoma de Madrid, a Politècnica de Catalunya, a Pontificia de Salamanca, a Europea de Madrid, a de Sevilla e a de Cádiz. Entre as empresas socias están escuelaIT, Mobile Engine, Quadrams e Gowex Mobile.