As galegas Arteixo e Level Telecom presentan a súa tecnoloxía na feira MOVE de Vodafone

Arteixo Telecom e Level Telecom seguen a presentar polo mundo adiante a súa tecnoloxía de acceso á Rede, concretamente a súa solución ReVisio, encamiñada especialmente a achegar conexión a Internet en autobuses interurbanos. Se hai uns días falabamos da concorrencia das firmas galegas na Xornada Proxecto Esfera, agora toca falar da súa participación activa no encontro MOVE (Mobile Vodafone Expo) que se está a desenvolver en Madrid, no Palacio Municipal de Congresos do Campo das Nacións.
Alí, entre outras cousas (tomas de contacto, sobre todo), está previsto que se desvelen algúns dos segredos da devandita tecnoloxía, que integra nun único equipo as vantaxes dun router innovador, dun corta lumes e dun axente de control de dispositivos.
Por certo que ReVisio xa non é nin tan sequera un proxecto. De feito, está a ser empregado xa por dúas compañías de transporte de viaxeiros por estrada. Con todo, ten máis utilidades alén do espazo físico dos autobuses: pode tirarse partido del en calquera unidade móbil (por exemplo: para facilitarlles ós medios informativos a transmisión de eventos en tempo real) ou mesmo como sistema de comunicacións en caixeiros automáticos.
A feira MOVE é un encontro para profesionais das telecomunicacións organizado pola firma Vodafone. Serve entre outras cousas para dar a coñecer o máis punteiro da innovación que se está a dar dentro deste sector. O salón ficará aberto ata a tarde do día de hoxe.