Amoeiro ofrece á veciñanza unha pasarela de pago vía Internet

O Concello de Amoeiro (Ourense) vén de renovar o seu servizo de recadación local cunha pasarela de pago vía Internet, co que o Goberno local quere introducir un extra de comodidade, modernidade e axilidade nos procedementos e tramitacións. Esta novidade veu acompañada, no actual exercicio fiscal, coa recuperación para o consistorio do dito servizo, que ata o de agora ficaba delegado na Mancomunidade Intermunicipal Voluntaria Santa Águeda. A pasarela de pagamento dixital posta a disposición dos contribuíntes está inscrita agora na web municipal www.amoeiro.gal.
En concreto, na devandita páxina habilitouse unha pestana rotulada co nome de recadación que ao ser premida conduce a unha ligazón que, á súa vez, redirecciona á páxina na que se poderán introducir os datos da persoa contribuínte.
Segundo informa o Concello, unha vez realizado o pagamento mediante a pasarela electrónica, o usuario recibirá unha mensaxe no seu enderezo electrónico procedente da dirección epasarela@abanca.com na que figurará o número de referencia que acreditará a satisfacción do tributo. Quen queira máis información sobre esta nova vía de pagos, pode solicitala no Servizo de Recadación Municipal sito na planta primeira da casa consistorial (Srta. Belén).