Adobe non adaptará o Flash Player a Android 4.1

Aínda que a única plataforma que se opuxo firmemente á tecnoloxía Flash de Adobe en dispositivos móbiles foi Apple, o tempo deulles a razón, e demostrouse que os elementos web con esta tecnoloxía deseñados para o PC non tiñan unha doada translación ao móbil (principalmente por basearse en pantallas táctiles en vez de en ratos informáticos) o que levou a Adobe a anunciar o pasado mes de novembro que ía centrar Flash no PC e en aplicacións móbiles con Adobe AIR, abandonando o desenvolvemento da versión móbil do Flash Player, o que está a piques de concretarse de xeito evidente, de xeito que agora anuncian que o engadido actualmente que leva os contidos en Flash a terminais con Android non vai a ir máis aló de Android 4.0. De feito, a partires do 15 de agosto o Flash Player vai deixar de estar dispoñible a través de Google Play, impedindo a súa instalación ou actualización.
Aínda que o Flash Player poida funcionar en terminais certificados que o inclúen presinstalado, no caso de que estes queiran actualizarse a Android 4.1 deberían desinstalar o Flash Player por non estar certificado para este sistema operativo no que amosaría un comportamento errático. Así, aínda que continúe a existir a posibilidade de usar Flash en Android 4.1, non sería recomendable. Tamén cómpre destacar que os usuarios que teñan terminais con versións vellas de Android e Flash poderán seguir contando con actualizacións de seguridade do Flash Player.