A nova edición da TechBusiness Week será completamente virtual

Presentación do foro fotografada por Santi Alvite

Se hai un tipo de evento que teña que acabar mesturándose coas redes mesmas é un evento TIC. En certa maneira, a evolución do foro galego TechBusiness Week (Semana Internacional de Tecnoloxía e Negocios) así o pon de manifesto: o tema dixital rematou por achegar (igualmente) forma dixital. Deste xeito o resumiu o reitor da Universidade de Santiago durante a presentación deste evento (a celebrar integramente de xeito virtual entre o 16 e o 19 de novembro): “Sería unha contradición que unha xuntanza TIC coma esta non espremera as posibilidades das propias TIC”.
O foro chega polo tanto á súa oitava edición de maneira renovada e cun salientable axuste conceptual e formal aos tempos que corren. Segundo apuntaron na presentación do evento o reitor (Senén Barro) e máis Marcelo Castelo (presidente da Fundación Sabiria, promotora do congreso), non é que o esixira unicamente a nova era dixital, senón tamén a nosa delicada situación nun planeta que esixe coidados. Así, a idea é que a Semana sirva tamén de exemplo a nivel de sostibilidade e de aforro, evitando, grazas ao seu formato virtual, o desprazamento dos asistentes.
O encontro está organizado polo Foro e-Gallaecia, entidade fundada pola Universidade de Santiago co obxectivo de desenvolver a Sociedade da Información.
Amais do devandito, outro dos grandes obxectivos do novo formato é facilitar ata onde sexa posible a asistencia. Desta maneira, empregaranse as máis avanzadas ferramentas de videocolaboración “que explotan de xeito intensivo as posibilidades das TIC”.
A organización do foro, que non descarta retomalo nun futuro na súa feitura presencial, terá catro bloques temáticos: Seguridade e Bases de Datos e Programación, Software Libre, Mobilidade e Telecomunicacións; e Management e Sociedade da Información. Polo que respecta a nomes concretos de asistentes, cómpre destacar a presenza de Javier Pedreira Wicho (editor de Microsiervos), Emilio Ontiveros (especialista en cuestións ligadas á Sociedade do Coñecemento), Miguel Ángel Amutio (responsable do esquema nacional de seguridade e interoperabilidade entre institucións liderado polo Ministerio de Administracións Públicas) ou Rafael Valcarce (presidente dunha das empresas máis representativas do eido estatal das telecomunicacións, a galega Arteixo Telecom).
A Semana Internacional de Tecnoloxía e Negocios foi presentada este mércores 11 no Colexio de San Xerome nun acto que contou coa participación dos devanditos Senén Barro e Marcelo Castelo e máis da secretaria xeral de Modernización da Xunta, Mar Pereira. Durante a súa intervención, Pereira salientou o valor da TechBusiness Week como unha das pezas fundamentais da promoción das novas tecnoloxías na nosa terra, tecnoloxías que ao seu xuízo son hoxe os aceleradores imprescindibles do cambio.