A multinacional Accenture aposta pola plataforma galega eHabilis, especializada no e-learning

A empresa tecnolóxica galega Sdweb Solucións Dixitais vén de darnos a coñecer un sistema de aprendizaxe a distancia (e-learning) e xestión de coñecemento na nube chamado eHabilis. Esta solución, dispoñible xa hai uns 9 meses, acadou a día de hoxe os 40.000 usuarios internacionais, con presenza e implantación en oito países, entre os que se atopan España, Reino Unido, México e Colombia, entre outros. Pois ben, segundo engade Sdweb, a plataforma eHabilis está a medrar de maneira axeitada a dar bos froitos, entre eles unha nova versión con melloras a ter en moi en conta como un deseño Web Responsive (adaptable a cada contorna e dispositivo), un sistema para xestionar as competencias profesionais ou a posta a disposición dos usuarios de servizos web de comunicación con terceiras aplicacións, entre outros elementos novos. Pero hai máis cousas que contar, como o feito de que Accenture pechara un acordo para comercializar a plataforma de xestión de coñecemento eHabilis entre a súa rede de clientes.
Segundo nos lembra a empresa galega, Accenture non elixiu a solución de seu porque si, de feito é unha empresa moi experimentada en tecnoloxía social corporativa e nas súas correntes e tendencias actuais, de aí que albiscase na plataforma de orixe galega un importante potencial de flexibilidade, personalización e interacción na nube. Accenture, de feito, apostou por eHabilis como a ferramenta para potenciar a comunicación interna e a formación entre os empregados das organizacións. O acordo asinado abrangue un plan de comercialización global. A sinatura do acordo, en palabras de Antonio Carro, account manager de eHabilis, “supón unha alianza que nos vai a permitir aumentar a nosa presenza a nivel internacional e presentar eHabilis como solución corporativa aplicada de maneira efectiva e integrada ás necesidades comunicativas e formativas das organizacións”.
A solución eHabilis, informa Sdweb, é unha solución unificada “que responde a tódalas necesidades de comunicación e formación das organizacións, ademais dende o seu lanzamento en 2012 experimentou un medre constante en cifras e expansión internacional”. O éxito da iniciativa, engade a empresa, radica en aplicar novas estratexias para xestionar o coñecemento nas organizacións, incrementando a comunicación entre os empregados e facilitando un sistema de formación constante en calquera lugar e intre. Brais Martínez, responsable do desenvolvemento funcional de eHabilis e doutor pola Universidade de Barcelona en xestión do coñecemento 2.0 explícanos: “Entendemos que as plataformas de e-learning achegan un valor a unha organización potenciando a formación tradicional pero non profundan na comunicación e xeración de coñecemento entre os propios empregados que realmente son os grandes activos de coñecemento dunha organización; ao mesmo tempo observabamos un crecemento das redes sociais corporativas pero sen aplicar metodoloxías e procesos para xestionar esa comunicación entre empregados. De que serve un Facebook corporativo se os empregados falan de temáticas alleas á organización e non é posible xestionar e pór en valor o coñecemento achegado?”, pregúntase. En base a isto, explica, eHabilis potencia ámbalas liñas, por unha banda optimiza os procesos formativos e ao mesmo tempo incorpora funcionalidades que permitan unha comunicación máis áxil e eficaz entre diferentes profesionais.
Nova versión: principais detalles
Como dixemos, eHabilis vén de lanzar unha nova versión do seu produto, que incorpora novas funcionalidades como a posibilidade de integrar e desenvolver un plan de competencias profesionais; un novo deseño gráfico baseado en Web Responsive considerando o novo escenario multidispositivo actual (computador, tablet, móbil) ou o acceso único e integrado a terceiros sistemas corporativos a través de servizos Web. Ao mesmo tempo, eHabilis mantén a súa oferta de produto e servizo adaptado ás necesidades de calquera organización. Así, infórmanos Brais Martínez, “dende a súa web corporativa calquera visitante pode acceder directamente a un demo do produto e saber o prezo exacto da implantación de eHabilis para a súa organización en función do nivel de soporte técnico e funcional que desexe, número de empregados e tempo de implantación”. Trátase polo tanto dun servizo a medida de cada casuística que está en pleno funcionamento ás dúas horas da súa contratación. César Martínez, product manager de eHabilis, comenta que un dos aspectos que se botaba en falta nos produtos de xestión da comunicación e formación é que non se adaptan ás necesidades de cada organización. “Nós, pola contra, ofrecemos un produto e servizo adaptado a cada casuística, unha gran empresa, un departamento dunha administración pública, unha franquía e as súas franquiciados, unha academia formativa, etc”, explica.