A galega Construdata21 lanza unha web para facilitar a busca de novos mercados das empresas
venres, 18 de febreiro do 2011
Construdata21, empresa galega
especializada nos servizos tecnolóxicos e innovadores para o sector da
construción, está a presentar novidades no ámbito das posibilidades de
internacionalización das nosas empresas. Máis polo miúdo, do que tratan estas
novidades é de contribuír ao seu espallamento nos mercados exteriores,
incrementando a súa competitividade e o seu potencial de medre. Os servizos
postos en xogo por Construdata21 teñen ademais o especial valor de chegar nun
intre delicado para as empresas do sector da construción, que precisa (sostén a
firma TIC) de datos de valor para coller folgos alén das nosas fronteiras.
Nesta liña de coller pulo é onde se insiren as ferramentas do portal propio que
a empresa galega vén de pór en xogo,
unha web con información de obras en todo o mundo e que dirixe tódolos seus
elementos a facilitar “a aventura da
internacionalización”.
En palabras dos responsables de
Construdata21, do que fornece este portal é de “información de oportunidade e de contacto de obras emprazadas en
España, Portugal e no resto do mundo, referidos a todo tipo de proxectos, públicos
e privados, en calquera fase de execución, achegándose tamén a relación das
principais empresas responsables”. O servizo, que se achega en castelán e
portugués, permite sentar os alicerces de futuras alianzas e operacións
conxuntas para que os provedores pequenos poidan tirar partido da experiencia
das grandes compañías do devandito tecido produtivo.