A española Optenet únese á IWF na loita contra os abusos a nenos en Internet

Optenet, compañía española do eido da seguridade en liña, vén de unir forzas coa organización británica Internet Watch Foundation (IWF) para loitar contra o racismo e o abuso sexual infantil na Rede. Segundo a acordo asinado os días pasados por ámbalas partes, a empresa concorrerá coa súa tecnoloxía de filtrado de contidos na Rede (contribuíndo a localizar e suprimir datos ilegais), achegando a IWF a súa experiencia de anos traballando coas autoridades e provedores de telecomunicacións (do Reino Unido, da Unión Europea e dos Estados Unidos) na persecución das devanditas actividades de ciberdelincuencia.
Sinalar que a Internet Watch Foundation (Fundación de Vixilancia en Internet) é un organismo de tipo consultivo xurdido ao abeiro do Goberno británico que integra arestora a 80 membros e desenvolve o seu labor de procura de contidos ilegais, complementándoo co fomento de boas prácticas na Rede que os preveñan.
Optenet, que traballa nunha liña semellante e (tamén) loitando contra a fenda dixital en España, asume este compromiso coa devandita organización como un paso crucial a prol da protección dos internautas e da Rede mesma: “A comunidade tecnolóxica comparte a responsabilidade de velar pola Rede para todos os usuarios”, comenta nun comunicado Ana Luisa Rotta, directora de Proxectos Europeos de empresa española.