A Universidade de Vigo impulsa un proxecto para favorecer o reemprego dos refugallos tecnolóxicos

O mundo rico desbota o seu lixo electrónico a costa do mundo pobre, e mentres os consumidores ollamos cara a outra parte. A xogada que lle facemos a África é dupla: por unha banda facemos todo o posible porque quede fóra do desenvolvemento e, pola outra, empregámola como balde de refugallos. Ademais, os residuos que quedan aquí tampouco son xestionados da mellor maneira. Cal sería o principio da solución disto? Para a Universidade de Vigo e os responsables do proxecto ECORAEE, unha boa parte do problema comezaría a amañarse con máis reutlización. Así de simple.
E isto valería tanto para os refugallos eléctricos como para os electrónicos. O que nos ocupa, a fin de contas, é o 4% do lixo que se xera en Europa, só en España, entre 100.000 e 160.000 toneladas de refugallos. Os riscos desta inxente cantidade de material obsoleto son ben grandes, sobre todo se temos en conta que a maior parte do tratamento que se ten aplicado, constatouse, non foi nin é o máis axeitado.
Dun tempo a esta parte comeza a impoñerse o senso común, aínda que tarde, e apóstase cada vez máis por darlle novas vidas aos aparellos dende as autoridades da Unión Europea, unha medida que reduciría custes e pegada ambiental e mesmo xeraría nova riqueza. A segunda vida dos aparellos, precisamente, é o lema de ECORAEE, un proxecto que vén da man de cinco departamentos da Universidade de Vigo, unidos co obxectivo común de favorecer metodolóxicas lóxicas e intelixentes para o tratamento de refugallos electrónicos. O proxecto, impulsado tamén pola empresa Revertia e o centro Enerylab, foi recoñecido recentemente pola Unión Europea dentro do programa LIFE+ 2012, apoio que lle vai servir para a obtención de 600.000 euros, o 50% do total de 1,2 millóns de euros aos que ascende o seu orzamento total.
O consorcio ECORAEE uniuse para demostrar que a reutilización si é unha vía económica, técnica e ambientalmente viable para resolver o problema destes residuos, “de tal modo que os problemas de eficacia e eficiencia identificados na aplicación da anterior Directiva non se volvan producir, polo que se refire a este ámbito da reutilización”, explicou o vicerreitor de Transferencia do Coñecemento, José Antonio Vilán na presentación de ECORAEE, un proxecto que segundo o reitor, Salustiano Mato, amosa “a capacidade de penetración da institución nos caladoiros financeiros europeos, algo que é posible utilizando a masa crítica da que dispoñemos”.
ECORAEE permitirá, entre outras cousas, informar dun proceso industrial de reutilización co fin de clarificar e amosar polo miúdo a súa viabilidade técnica e económica, poñéndoo a disposición das administracións públicas encargadas de establecer estándares regulamentarios e medidas para favorecer a súa posta en marcha. Os departamentos de Dereito Público, representado po Roberto Bustillo; Economía Aplicada e grupo REDE, a través da participación de Miguel Rodríguez; Enxeñaría Informática, representado por Javier Rodeiro; Enxeñaría Eléctrica representado por José Cidrás e de Enxeñaría Mecánica, polo propio José Antonio Vilán, participarán no proxecto no que tamén estará presente a Oficina de Medio Ambiente da Universidade de Vigo, a través de Benedicto Soto.
ECORAEE encamíñase a afondar no coñecemento do esixido nas normativas sobre o tratamento do dito lixo e identificar puntos de indefinición para propor novos estándares e regulación ao lexislador europeo. Establecer un método de cálculo único sobre a análise do ciclo de vida dos refugallos; definir estándares regulamentarios ou deseñar un balance económico do proceso de recuperación para o reemprego e comparativa coa reciclaxe, son outros dos resultados que se pretende acadar co proxecto.