13 millóns de euros para impulsar en España a aula dixital

Seguimos a falar de pulo á dixitalización na ensinanza, pero desta volta atendendo ao que está a facer o Goberno central. Segundo vén de informar o Ministerio de Industria, este departamento e máis o de Educación asinaron estes días un convenio de colaboración para impulsar o afianzamento das novas tecnoloxías no sistema educativo español. O documento abrangue entre outras cousas o desenvolvemento de actuacións ao abeiro do Programa Escuela 2.0, do que xurdiu precisamente a iniciativa galega Proxecto ABALAR (coas súas características propias de seu). Máis polo miúdo, o obxectivo deste acordo é favorecer a colaboración na posta en marcha de proxectos comúns a tódalas Comunidades Autónomas no eido dos contidos dixitais educativos, amais de no deseño de novos modelos de negocio para pular o desenvolvemento da industria española tecnolóxico-educativa.
O convenio inclúe un investimento de preto de 13 millóns de euros para un ano. Deste orzamento, sinala Industria, 8,3 millóns de euros vén da man deste Ministerio, a través da entidade pública e empresarial Red.es, e 4,6 millóns proceden do Ministerio de Educación. “A participación das Comunidades artellarase a través da sinatura dun convenio trilateral entre o propio Goberno autonómico e os devanditos Ministerios”, engádese.
Por certo que entre as liñas de actividade do convenio tamén se atopa o desenvolvemento do proxecto Agrega, unha ferramenta ao servizo das TIC na aula que lles achega a tódolos implicados (profesorado, alumnado e familias) un contorno común de intercambio de aplicacións e contidos dixitais educativos. No caso galego, esta estratexia xa tería o seu equivalente en EspazoABALAR, un portal ao servizo de toda a comunidade educativa e que entre outras cousas lles permite ás nais e aos pais facer un seguimento en liña das traxectorias formativas dos seus fillos.