O satélite galego XaTcobeo deixa atrás a liña das 180 xornadas en órbita
venres, 10 de agosto do 2012
O XaTcobeo, o satélite galego que ten
pasado por Código Cero con motivo dos
seus últimos detalles antes de iniciar a súa órbita, e
tamén despois, xa vén de deixar atrás a liña dos seis meses
de actividade por enriba das nosas cabezas. O aparello, deseñado por
investigadores da Universidade de Vigo (dende o Campus de Vigo e,
tamén, dende o de Campus
de Ourense), duplica deste xeito os seus prognósticos de vida
útil, logo do seu lanzamento o pasado 13 de febreiro sobre o foguete
Vega da Axencia Espacial Europea (ESA). O
XaTcobeo foi, deste xeito, alén de calquera expectativa xerada, con
180 xornadas no Espazo e achegando comunicación continuada cos
investigadores e os estudantes da estación de control de Vigo.
Cousas como por exemplo verificar o bo funcionamento do despregue de
paneis solares, levar a cabo os exames relativos á radiación solar
e a capacidade do aparello para aturala ou avaliar a resistencia
contra treboadas solares e altas temperaturas (como, de feito, tivo
que sufrir).
O coordinador do proxecto, Fernando
Aguado, en declaracións ao Faro de Vigo, sinala que tódolos
integrantes do equipo responsábel do XaTcobeo están moi satisfeitos
pola boa marcha do satélite, traxectoria á que non lle afecta en
nada o feito de que nas últimas semanas variase a súa posición,
dende unha altura de case 1.500 quilómetros aos 1.350, comportamento
por outra banda “normal”, segundo explica Aguado. Por certo que
non se descarta que o satélite siga funcionando varios meses máis,
xa que a súa posición vai mellorando paseniño.
Como dixemos, o XaTcobeo converteuse
nunha realidade grazas á contribución da Universidade de Vigo, que,
en colaboración co Instituto Nacional Técnica Aeroespacial (INTA),
puido desenvolver un proxecto punteiro, coordinando a 8 grupos de
investigación, 30 doutores e 40 estudantes de postgrao.
O XaTcobeo,
lembraremos, é un picosatélite que responde ao estándar de
enxeñaría CubeSat, que permite a construción de satélites a baixo
custe e en prazos breves, o que posibilita o acceso á tecnoloxía
espacial para empresas e universidades. Alumnado, docentes e
investigadores da Escola de Enxeñaría de Telecomunicación e da
Escola de Enxeñaría Industrial do Campus de Vigo e da Escola
Superior de Enxeñaría Informática do Campus de Ourense, foron os
responsables do traballo de deseño, desenvolvemento, fabricación e
integración, levado a cabo durante case catro anos.
Pola súa
banda, os investigadores do INTA (Instituto Nacional de Técnica
Aeroespacial), ademais de supervisar as actividades levadas a cabo na
Universidade, encargáronse de dar soporte na xestión e enxeñaría,
desenvolvemento da carga útil de radiación e o mecanismo de
despregue, así como dos ensaios. Uns sesenta estudantes, 32 docentes
e oito grupos de investigación fixeron posible que a de Vigo fose a
primeira universidade europea en enviar ao espazo un CubeSat 1U
construído cos estándares da Axencia Espacial Europea.