O mapa de Xeodestinos terá un lugar destacado no stand de Galicia en Fitur 2012

Baixo o lema, Galicia, gárdasme o segredo?, o Goberno galego, da man de Turgalicia, instalarase na Feira Internacional do Turismo de Madrid, Fitur 2012, do 18 ao 22 de xaneiro, onde promoverá os dez produtos cabeceira de marca cos que porá en valor o destino turístico da nosa Comunidade.
Xa que logo, dende o seu stand promoverá produtos como: Camiño de Santiago, Faros e praias salvaxes, Mananciais de Galicia, Bosques de Galicia, Santuarios máxicos, Patrimonio oculto ou Lugares únicos, entre outros vellos coñecidos de tódolos galegos e galegas.
Asemade, a entidade pública aproveitará a ocasión para dar a coñecer entre os principais operadores turísticos e o público en xeral, o mapa de Xeodestinos, presentado a finais do pasado ano polo presidente da Xunta, Alberto Núñez Feijóo.
Os xeodestinos constitúen un novo concepto de ordenación e promoción do destino turístico Galicia dividindo o territorio galego en 14 áreas turísticas, agrupadas segundo as singularidades de cada zona.
Deste xeito, Galicia dívidese turisticamente nos seguintes xeodestinos: Rías Altas (Ferrolterra-Eume e A Coruña-As Mariñas), Costa da Morte, Terras de Santiago, Mariña Lucense, Lugo e A Terra Chá, Ancares-Courel, Ribeira Sacra, O Ribeiro, Terras de Ourense e Allariz, Celanova-A Limia, Verín-Viana, Manzaneda-Trevinca, Rías Baixas (Ría de Muros e Noia, Ría de Arousa e Terras de Pontevedra e Ría de Vigo e Baixo Miño) e Deza-Tabeirós.