Malas vendas do Nexus One nos EE.UU.

Un estudo con datos non oficiais elaborado por Flurry Analytics estimaba que o número de terminais do móbil Nexus One vendidos na súa primeira semana no mercado reflectía uns malos resultados para o móbil promovido por Google, que só tería colocado 20.000 unidades no que agardaban que fose un forte comezo, e agora volven a revisar as cifras de vendas do Nexus One para o seu primeiro mes, e parece ser que mantense o mesmo ritmo de vendas, cuns 80.000 terminais vendidos o que non só sería a oitava parte do que no seu día vendeu o iPhone orixinal, senón que incluso queda moi por debaixo do Motorola Droid (outro móbil que funciona co sistema operativo Android, coma o Nexus One, pero que vendeuse cunha campaña promocional bastante potente).
Dá a impresión de que dende Google, pese a colaborar no deseño dun terminal potente e atractivo, fracasa na súa comercialización, posiblemente por falta de experiencia neste sector, o que demostran as moitas queixas existentes polo deficiente servizo de atención ao cliente que están a dar nos EE.UU.
Haberá que agardar a ver a chegada do Nexus One a Europa para comprobar se mellora a súa acollida comercial, en boa medida porque parece que aquí chegará da man de operadoras solventes (coma Vodafone) e non a través de compañías coma T-Mobile nos EE.UU. (país no que tal compañía ten pouco peso).