INEO convoca esta semana aos principais representantes do sector TIC no seu Foro de Innovación
luns, 24 de setembro do 2012
Esta semana a sede da CEP en Vigo acolle un
evento profesional de especial potencialidade para desenvolver e impulsar unha
fórmula que na nosa terra, en boa medida grazas ao traballo de asociacións como
INEO, xa leva tempo aplicándose no eido tecnolóxico-dixital: a fórmula da
colaboración e do traballo conxunto para saírmos da crise. O I
Foro do Sector TIC galego para a Innovación Empresarial, a desenvolver o mércores
260 de 10 a 14.00 horas, vén precisamente da man de INEO, co obxectivo firme de
fortalecer o traballo entre os axentes do sistema galego de innovación,
institucións públicas e empresas TIC.
O foro acollerá, entre outras cousas, a
presentación das Estratexias Nacionais e Rexionais de Innovación, amais de
servir de palestra aos resultados do proxecto de Benchmarking Tecnolóxico desenvolvido
pola asociación TIC galega. A inauguración correrá a cargo de Ricardo Capilla,
director xeral da Axencia Galega de Innovación, José Manuel Fernández García,
xerente do IGAPE e máis Jorge Cebreiros, presidente de INEO.
No foro, como dixemos, estarán representados
os principais axentes do sistema galego de innovación, empresas do sector TIC e
as institucións encargadas de impulsar o desenvolvemento económico e
tecnolóxico de Galicia. O obxectivo, en palabras de INEO: “Activar estratexias de innovación colaborativa, que impulsen a
cooperación entre equipos de investigación, centros tecnolóxicos e empresas TIC
para pór en marcha en Galicia proxectos de innovación nos que se desenvolvan
novos produtos e servizos tecnolóxicos”.
Programa
de contidos
Trala
inauguración, e arredor das 10:20 horas, Javier Echávarri, técnico do
departamento de Telecomunicacións, Electrónica e Informática. Dirección de
Mercados Innovadores Globais do Centro de Desenvolvemento Tecnolóxico e
Industrial (CDTI) exporá as Estratexias Nacionais de Innovación.
Será a oportunidade para coñecer de primeira man as tendencias que marcarán a
I+D dos vindeiros anos en España.
A continuación, en torno ás 10:50 horas, Pilar
Morgade, directora da Área de Crecemento e Valorización da Axencia Galega de
Innovación, presentará as Estratexias
Galegas de Innovación, un achegamento á realidade galega e aos plans de
futuro para a I+D no noso territorio.
Arredor das 11:20 horas, será o intre de
abordar a Vixilancia Tecnolóxica desde diversos puntos de vista, un aspecto que
definirán Miguel Regueiro, responsable de Contas de GRADIANT, Centro Tecnolóxico
de Telecomunicacións de Galicia; Sonia Pazos, directora do departamento de
Proxectos de Innovación da Fundación Empresa-Universidade Galega (FEUGA) e
Carmen Iglesias, responsable da Oficina de Proxectos e Calidade do Centro de
Investigación en Tecnoloxías da Información e das Comunicacións (CITIC), da
Universidade da Coruña. Estes centros serán os que lideren as mesas de traballo
con empresas TIC e que iniciarán a partir das 12:30 horas.
Presentación
dos resultados do Proxecto de Benchmarking Tecnolóxico
O Foro do
Sector TIC galego do vindeiro mércores acollerá, ademais, a presentación das
conclusións do proxecto de Benchmarking Tecnolóxico, desenvolvido por
INEO para identificar as oportunidades tecnolóxicas máis destacadas no ámbito
europeo e promover a creación dunha rede de intercambio de coñecemento que
traslade estas oportunidades ao sector TIC de Galicia.
Lucía
Gregorio, directora xeral de INEO, presentará ás 12:00 horas os resultados
deste proxecto, co que se pretende impulsar a competitividade do sector TIC de
Galicia e o seu posicionamento no mercado global.
A clausura
do Foro terá lugar sobre as 13:50 horas, e correrá a cargo da Axencia para a
Modernización Tecnolóxica de Galicia (AMTEGA) e de Jorge Cebreiros, presidente
de INEO.
Asistencia
de balde
A asistencia ao Foro do Sector TIC galego para
a Innovación Empresarial é gratuíta e aberta a todos aqueles empresarios,
axentes do sector TIC e interesados en coñecer as claves para o futuro
inmediato da innovación galega. É obrigado a reserva de praza, que pode
realizarse no teléfono 986 112 570 ou no e-mail administracion@ineo.org.
