A galega Austen traballa nunha tecnoloxía low cost para facilitar a agricultura de precisión na nosa terra
venres, 3 de xaneiro do 2014
O grupo galego Austen,
do que falamos
recentemente para informar das potencialidades das súas
estacións agroclimáticas Siega
System (especialmente deseñadas para previr pragas en cultivos e
para facilitar o control de rego de terras a distancia), vén de
anunciar que vai liderar un proxecto para desenvolver unha ferramenta
de baixo prezo “que facilite a agricultura de precisión ao
agricultor galego”. Trátase do proxecto AgroTool e baséase na
tecnoloxía WSN (Wireless Sensor Network, unha rede con sensores
autónomos distribuídos para controlar condicións físicas ou
medioambientais). Segundo informa a empresa galega, a solución
AgroTool supón a evolución natural de Siega, e incorpora auto
recoñecemento de sensores e a programación en remoto.
“O proxecto dará como
resultado unha solución intuitiva”, sinalan dende Austen, que
engaden que será “de manexo e mantemento doados, permitindo
controlar as plantacións desde o móbil, adaptando os consumos de
auga ou fitosanitarios ás necesidades do cultivo, mellorando a
calidade do produto e aforrando custos”.
O xerente de Grupo
Austen, Felipe Sas Río, xunto ao director financeiro da firma, Ramón
Sas; o responsábel do departamento de I+D da empresa, Alejandro
Casteleiro, e a enxeñeira María Rodríguez, foron os encargados de
presentar a solución ante os medios, este venres 3 de xaneiro en
Ferrol. Segundo fixeron saber, AgroTool “contribuirá á
modernización do campo galego a través da innovación, xa que
fornecerá unha ferramenta low cost para facilitar a
agricultura de precisión ao agricultor galego e permitirá afrontar
con garantías o proceso de internacionalización das solucións
intelixentes para agricultura que desenvolveu Austen”.
Foi Felipe Sas quen se
encargou de explicar que estamos ante unha evolución natural de
Siega System, sistema intelixente de xestión agrícola desenvolvido
pola firma ferrolá, un sistema que permite controlar as plantacións
desde o móbil ou computador, xa que mide parámetros como humidade
ou temperatura, tantos como desexe o propietario da explotación.
Lembrar que esta tecnoloxía envía cada cinco minutos información
ao agricultor e alertas no caso de risco de enfermidades, co que
permite anticipar solucións. A fase avanzada de Siega non é outra
que AgroTool, unha adaptación do sistema previo á estrutura
minifundista do agro galego. Deste xeito, Austen mellorará Siega en
tres aspectos: reducindo custes, incorporando a función de auto
recoñecemento (sensores con tecnoloxía Plug and Play) e permitindo
a programación en remoto do software. Con respecto a último caso, a
idea é evitar que os técnicos se teñan que desprazar fisicamente
aos puntos nos que se instalen as estacións de AgroTool cando sexa
preciso incorporar novos parámetros de medición. E, deste xeito,
facilitarase a comercialización do produto máis aló das fronteiras
galegas.
Grupo Austen, líder do
proxecto, ten máis compañeiros de viaxe no mesmo, xa que lle acompañan as
empresas Plexus (A Coruña) e CualiTic (Santiago); o Instituto
Tecnolóxico de Galicia, e a Cooperativa Os Irmandiños. A Axencia
Galega de Innovación, dependente da Xunta de Galicia, confirmaba o
pasado mes o seu apoio á iniciativa concedéndolle unha subvención
de 300.000 euros a través dos Programas Conecta PEME 2013. En total,
o proxecto conta cuns orzamentos duns 653.000 euros.
Ramón Sas prevé que en
xuño se testen as primeiras estacións AgroTool, aínda que o prazo
temporal do proxecto remata en 2015. Segundo recordou, “será unha
ferramenta baseada na tecnoloxía WSN facilmente integrable nos
sistemas de xestión xa existentes nas PEME agrícolas; de doada
instalación; de gran resolución espacial e temporal na mostraxe
das variables de interese e que sexa quen de soportar un elevado
número de sensores heteroxéneos”.
Como dixemos, no proxecto
participa activamente a Cooperativa Os Irmandiños, unha das
cooperativas agroalimentarias máis grandes da nosa terra e con
presenza tamén en Asturias. Neste proxecto ofrecerá apoio externo á
iniciativa como usuario potencial da solución. Realizará un
seguimento das accións e resultados, exporá necesidades e cederá
instalacións e explotacións para realizar pilotos demostrativos.
Asemade, contémplase realizar a transferencia tecnolóxica ao
sector, a través de accións de formación e difusión.