A entidade galega AGESTIC, finalista nos premios Fundetec
mércores, 4 de febreiro do 2009
A recta final dos premios Fundetec, convocados cada ano pola entidade
do mesmo nome co fin de recoñecer o traballo a nivel estatal a prol do
afianzamento das novas tecnoloxías, terá presenza galega. Máis polo miúdo, a da
Asociación Galega de Empresas TIC
(AGESTIC), que resultou finalista na categoría de Mellor Proxecto de Entidade non Lucrativa destinado a Cidadáns. Os galardóns,
que se entregarán o vindeiro 12 de febreiro nun acto que estará presidido polo
Secretario de Estado de Telecomunicacións (Francisco Ros), sitúanse arestora
entre o máis salientable a nivel de recoñecemento tecnolóxico en España. Para
AGESTIC, informa a entidade nun comunicado, o feito de situarse na final
significa “un gran trunfo como asociación
ao servizo das empresas do sector galegas, amais dun orgullo como único
representante da nosa terra neste certame”.
Por certo que a asociación concorre nos premios grazas ao
seu compromiso xeral pola promoción das novas canles dixitais e, máis
especificamente, pola súa iniciativa Nin
máis nin menos, unha proposta inserida dentro do Plan Avanza que foi
dirixida a fomentar a participación en liña das mulleres emprendedoras e
autónomas.
O proxecto, que competiu con outros 41 (dos que só tres
foron seleccionados como finalistas dentro da devandita categoría), contou coa
colaboración de AGESTIC, a Federación de Autónomos de Galicia (FEAGA) e a Obra
Social de Caixa Galicia. O 12 de febreiro é a data sinalada para dar a coñecer
os gañadores do certame.
FUNDETEC é unha Fundación promovida polo Ministerio de
Industria e a Entidade pública Red.es, que conta como patrocinadores a
importantes empresas como Telefónica, Intel, HP, O Corte Inglés e Caixa Madrid,
que premia anualmente as mellores iniciativas para estender a Sociedade da
Información en España.