Un Meetup en Lugo destacará a importancia do deseño dunha páxina web

O vindeiro 28 de maio ás 19:00 o auditorio do Vello Cárcere de Lugo acollerá un Meetup de WordPress de Lugo protagonizado pola deseñadora Sabela Muñiz, deseñadora de produto, UX/UI e 3D, quen baixo o título de O que di a túa web sen palabras amosará como os elementos visuais, espaciais e de interacción dunha páxina web inflúen silenciosamente na percepción e comprensión do usuario.
Muñiz afondará na importancia da comunicación na web máis aló do texto, con cores, espazos, iconas, imaxes ou efectos visuais que transmiten múltiple información. Para ilustrar a temática a relatora comentará exemplos, boas prácticas e erros comúns, para que os asistentes poidan mellorar na construción de páxinas web nas que sexa posible moverse sen ter case que ler unha soa palabra.