Sanidade recibiu 142 propostas innovadoras para os proxectos Hospital 2050 e Innova Saúde
xoves, 27 de setembro do 2012
No marco da II
Xornada Técnica que avalía a convocatoria aberta a propostas de recursos
innovadores para os proxectos de modernización da noso tecido sanitario
Hospital 2050 e Innova Saúde, a
Consellería de Sanidade fixo saber que arestora recibiu un total de 142
propostas da man de 40 participantes. Así o informou o director xeral de
Innovación e Xestión da Saúde Pública da Consellería de Sanidade, Manuel Varela
Rey, que engadiu que do total dos proxectos recibidos, 33 proveñen de entidades
investigadoras (universidades) e 110 de empresas privadas.
Polo que respecta
á convocatoria, trátase dunha liña aberta, dirixida a persoas físicas ou
xurídicas “que teñan vontade de
participación e colaboración co Servizo Galego de Saúde”, informa o SERGAS,
que indica que o obxectivo disto é recibir achegas e suxestións de recursos
innovadores que favorezan o desenvolvemento e materialización dos
proxectos Innova Saúde e Hospital 2050. En definitiva, que universidades e
empresas colaboren coa Administración sanitaria galega no deseño do modelo
sanitario do futuro.
O promedio de
propostas recibidas por subproxecto, engade o SERGAS, é de 11, sendo o
subproxecto de fogar dixital-accesibilidade a servizos sanitarios, con 25, o
que máis propostas recibiu. Outros subproxectos con máis propostas foron,
hospital na casa, e paciente experto, con 20, cada un deles; hospital dixital
seguro, con 18; sistema integrado de información e xestión de datos clínicos e
epidemiolóxicos, con 16; e profesional 3.0, e produtos de teleasistencia
multiespecialidade, con 15.
Sinalar que Hospital
2050 é un proxecto encamiñado “a
desenvolver un hospital do futuro, eficiente, seguro, respectuoso co medio
ambiente, adaptado ás novas tecnoloxías e centrado no paciente”. Pola súa
banda, a iniciativa Innova Saúde céntrase na prestación de servizos
asistenciais, cun novo modelo de hospitalización e un novo procedemento para os
procesos agudos.