O novo Hyrule Warriors será unha precuela de Breath of the Wild

Para facer máis doada de levar a espera pola secuela de The Legend of Zelda: Breath of the Wild dende Nintendo anunciaron hoxe un título ambientado un cento de anos antes, Hyrule Warriors: La era del cataclismo, que chegará a Nintendo Switch o vindeiro 20 de novembro a un prezo de 59,99 euros e dista bastante do que ofrece Breath of the Wild, xa que nin pertence ao seu mesmo xénero nin chega do mesmo equipo de desenvolvemento, senón que sería unha secuela de Hyrule Warriors, xogo que inicialmente chegou a Wii U en 2014, e que chego posteriormente a outras consolas de Nintendo, confirmando o ben que casan os personaxes de The Legend of Zelda en mecánicas propias da saga Dynasty Warriors.
Temos así que Hyrule Warriors: La era del cataclismo recupera o mesmo concepto do anterior xogo de Koei Tecmo Games ambientado do mundo de Zelda, que desta volta amosa os aspecto de Hyrule antes da devastación do cataclismo. Poderemos loitar empregando a Link, a Zelda e aos elixidos de Hyrule para deter o mal que ameaza con destruílo todo, tendo que participar en veloces combates nos que empregar potentes armas e derrotar a exércitos inimigos e a monstros formidables.
Para que os seareiros de Breath of the Wild estean satisfeitos, o xogo contará cunha completa historia narrada a través de secuencias de vídeo con voces, que permitiranos afondar nos acontecementos previos ao que para moitos é o mellor xogo de Nintendo Switch.
Este novo Hyrule Warriors contará tamén con cooperativo local, de xeito que nunha mesma Nintendo Switch será posible que un par de xogadores una forzas na batalla, podendo así separarse para cubrir maiores distancias, cumprir obxectivos e derrotar ás forzas do mal.