HP segue a liderar a venta de servidores x86 en España

Hewlett-Packard, a empresa tecnolóxica de meirande presenza a nivel internacional dentro do seu sector, vén de demostrar unha vez máis que segue en primeira liña de mercado en canto a servidores x86 se refire, ao acadar en España unha cota de mercado do 51,5 por cento en unidades subministradas no cuarto trimestre de 2008.
O competidor que máis se aproxima a HP neste tipo de servidores está moi lonxe de superar esta cota de penetración, estando a rentes do 21 por cento das ventas, segundo os datos da consultora tecnolóxica IDC, correspondentes ao cuarto trimestre de 2008.
Isto significa que un de cada dous servidores x86 que se venden no noso país levan o selo de HP o que supón para a compañía obter unha cota de mercado de máis do cincuenta por cento.
A consultora vén de anunciar asemade, que das 29.820 unidades de x86 vendidas en España, 15.344 corresponden a HP, o que representa máis que a suma do resto de tódolos fabricantes xuntos.