Estréase a primeira tenda de comics dixitais española

Hai preto dun ano presentábase no Saló del Cómic de Barcelona Koomic, coa promesa de converterse na primeira tenda española dedicada exclusivamente á venda de cómic dixital, e agora, cun preto dun ano de retraso, esta nova plataforma ve a luz hoxe con 25 títulos no seu catálogo, ao que pode accederse tanto dende a súa páxina web (onde tamén permiten a descarga das obras nun formato protexido coa tecnoloxía de Adobe Digital Edition) como a través dunha aplicación para iPhone/iPod Touch e iPad (está en preparación unha versión para Android), con prezos que van ata os 4,99 euros, o que supón un aforro máis que considerable con respecto á súa edición impresa (no caso de existir).
Sorprende que mentres os libros en formato electrónico só teñan un desconto aproximado do 20%, no caso de Koomic podemos ver obras cunha rebaixa de entre o 25 e o 82%, coa posibilidade de abrir a distribución a comics que nunca viran a luz en papel.
Esta tenda de comics dixitais en español tivo que facer fronte a moitos atrancos no seu proceso de creación, pois as negociacións coas distintas editoriais (Astiberri, Azake Ediciones, Diábolo Ediciones, Dib-buks, Dolmen Editorial, Edicions de Ponent, FunHunter, Inrevés Edicions…) e a elaboración da aplicación para iOS cun formato de lectura viñeta a viñeta (como fan editoras grandes como DC e Marvel), pero unha vez estreada esta plataforma supón un antes e un despois para a edición de comics en España.
Koomic promete novidades semanais, continuando as series iniciadas, incorporando novas obras e prometendo que en breve contarán no seu catálogo cos mellores comics de Panini (compañía que edita en papel os comics da Marvel e doutras importantes editoriais norteamericanas e xaponesas) en formato dixital.
Para que os interesados poidan facer un achegamento a esta plataforma, Koomic estréase ofrecendo 4 comics de balde, e sorteando 10 vales de 20 euros cada un entre as persoas que fagan un seguimento de Koomic en Facebook ou Twitter. Tamén contan cunha canle en YouTube con entrevistas e titoriais sobre o uso da súa plataforma.
O pagamento dos comics adquiridos en Koomic pode facerse mediante PayPal, tarxetas de crédito ou saldo Koomic (que pode recargarse mediante cupóns) no caso de acceso vía web, mentres que na aplicación para iOS faranse os pagamentos a través de iTunes.

Anuncio de Koomic