A tecnoloxía de Microsoft nos coches Ford permitirá o control dos móbiles e os reprodutores dixitais a través da voz

Microsoft, segundo deu a coñecer estes días na feira CES de Las Vegas a través do seu máximo representante, Bill Gates, está moi interesada en saír dos computadores e meterse ata no máis recóndito da tecnoloxía do fogar e da oficina. É dicir: se por eles fose, todo estaría interconectado e falando a mesma lingua, o reprodutor de MP3 e o computador, o móbil e a cámara dixital, a torradora e o ferro de pasar. Dentro de toda esta listaxe de aparellos correndo coas diferentes versións de Windows e semellantes, Microsoft vén de incluír un elemento máis ó que se cadra tiñamos nun aquel de esquecemento: o coche.
Nesta liña, a compañía vén de asinar un acordo con Ford para desenvolver Sync, unha ferramenta tecnolóxica que, por así dicilo, poida engadir as pezas de intelixencia que nos faltan ós condutores (coma un copiloto dixital, pero que non se pon prosma co estrito seguimento das normas de tráficos porque non está sacando o carné nin berra cando se nos cala o coche nun semáforo en verde).
O caso é que se trata dun sistema baseado na plataforma Microsoft Auto que, por medio do emprego da voz, permitiranos ter controlados tódolos diferentes elementos vinculados ás novas tecnoloxías da información que albergue o automóbil. Por exemplo (segundo sinala a multinacional): poderemos marcar telefonicamente con mans ceibes, sincronizar a listaxe de enderezos ou ler no sistema de audio do coche as mensaxes de texto recibidas.
Asemade, poderemos controlar os reprodutores dixitais empregando comandos de voz ou controis situados no volante.
Ademais, o sistema é actualizable, “polo que Sync pode afacerse ós novos aparellos que se introduzan no mercado cunha sinxela actualización”, apunta a compañía. A ferramenta, que constituíu un dos capítulos do discurso de apertura de Bill Gates que máis chamou a atención dos presentes, estará dispoñible na primavera de 2007 nunha ducia de modelos da casa 2008 da casa Ford, incluídos o Focus e os Sedán 500.